Aruba Certification Program a celebra 10 aña di existencia

ORANJESTAD(AAN): Diabierna a celebra e di 10 aniversario di Aruba Certification Program (ACF).

Esaki ta un programa cu a wordo diseña pa mehora e experiencia di nos bishitantenan den su totalidad.

E intencion ta pa realza nos orguyo Arubiano door di conoce y sa e informacion corecto tocante nos isla y na mes momento haci e promesa pa semper duna e servicio cu e toke di Zjeito manera nos so por den e region.

Esaki segun presentador na e evento Larissa Bermudez.

CEO di ATA Ronella Croes tambe a hiba palabra y el a trece dilanti cu na 2011 ATA a forma parti integral di inicio di Aruba Certification Program.

“Si nos bay bek na 2011, e aña ey a certifica un total di 214 persona, mientras cu aña pasa a certifica un total di 1414 persona”.

E programa pues ta sigui tin su interes  y e equipo ta sigui haci un tremendo trabao pa pusha esaki debidamente, segun Croes.

E CEO a splica cu e ACF ta sumamente importante pa ATA pasobra servicio ta un di e pilarnan cu ta carga industria di turismo.

“Nos ta exporta un producto turistico como Aruba y un producto cu ta wordo califica como un producto di servicio”, segun Croes, kende a sigui bisa cu e programa aki di entrenamento ta sirbi pa mantene y eleva e calidad di servicio cu nos ta Aruba ta brinda.

El a splica cu esaki sigur ta necesario, pasobra e consumidor a bira mas exigente y ta constantemente en busca di otro cosnan.

Na Aruba nos mester percura pa na tur momento brinda e bishitante e balor pa su placa, pa e bay bek cu e satisfaccion cu e viahe tabata bale la pena.

Na 2018 ATA a bin cu e iniciativa pa independiza maneho di e programa aki y percura asina tambe pa e ta un aspecto duradero cu no ta depende di ATA of otronan so, pero cu tin su propio fundacion y cu a wordo reforza pa un directora nobo.

A institui un ‘board’ tambe cu ta consisti di miembronan  ATA, Universidad di Aruba, Gobierno di Aruba y AHATA.