Relacion cu pregunta di algun parlamentario: - ORANJESTAD (AAN) – Minister di Husticia y Asunto Social, Rocco Tjon, tabata presente den e reunion Publico den Parlamento, Diahuebs cu a pasa.
Dirigiendo na Presidente di Staten, Edgard Vrolijk, e dignatario a cuminza expresando cu tin cuater persona den e mundo aki, cu e ta stima hopi y pa kendenan e ta haci tur cos y cu ta su yiunan Jadah, Rovan cu ta den cielo, Rovanne y Roven.
Minister Tjon a expresa cu solamente un hende cu ta mama of tata, por compronde e stimacion pa e yiunan, cu ta un stimacion diferente, y a señala cu e ta lamenta e nivel di hende cu tin hopi experiencia den esaki, vooral riba tereno social.
E mandatario a menciona cu den Parlamento tin hopi experto riba e tereno aki, y a menciona e Parlamentarionan Mervin Wyatt-Ras, Trahador Social di Curriculum, Marisol Lopez-Tromp, cu ta un trahador social di origen, y ademas e Psicologo di Mucha Misha Raymond. E minister a indica tambe cu tin diferente experto den fraccion di MEP, riba tereno social.
“Anto mi no por imagina kico nos ta haciendo awe, irespecto kico kier haci cu mi persona, contra bienestar di Jadah. Pero Jadah sa cu mi stime y Jadah sa cu ora e cumpli 18 aña, e mes por busca mi drechi”, Minister Rocco Tjon a expresa y a dirigi na Presidente di Staten, bisando cu e no tin nada, nada di sconde.
Minister Tjon gradici señor Miguel Mansur, señora Mervin Wyatt-Ras, señora Marisol Lopez-Tromp, y tur cu a haci e preguntanan aki, pasobra e ta mire como un oportunidad pa di e forma aki e por comunica cu su yiu.
“Cada vez cu mi haya e oportunidad pa mi por splica Jadah kico a pasa, y berdad mi ta haya un oportunidad cu boso ta brinda mi; pesey mi ta agradecido”, Minister Rocco Tjon a subraya.
E mandatario a referi na locual parlamentario Miguel Mansur a desaroya y cu tambe a experiencia e biahe di trabao cu, como parlamentarionan, nan a haci na Bonaire, como uno hopi placentero. Nan a intercambia di idea, den diferente comision di trabao, y como parti di e Agenda, el a organiza un meeting tambe cu parlamentario Mansur a experiencia y nan a bay hopi bon cu otro. “Pesey mes mi ta duna señor Mansur e beneficio di duda, bo ta nobo den politica y mi no ta bay den su bida priva”, e dignatario a subraya.
E dignatario a bisa cu den e reunion aki si, e ta pone tur cos riba mesa pa tur hende. Den un siguiente articulo DIARIO lo sigui elabora tocante e declaracion di Minister Rocco Tjon.
