Hose Figaroa, Presidente di FTA: -*Nan kier yega na palabracion concreto
ORANJESTAD (AAN) – E presidente nobo di FTA, mr. Hose Figaroa, tambe a duna su declaracion na DIARIO, tocante e accion di protesta di e trahadornan di RBC y e sosten cu nan a haya for di e sindicato.
Figaroa a declara cu e trahadornan ta disgusta pasobra atrobe e banco a bin cu e peticion pa reduci e personal, unda cu gerencia a acerca un grupo grandi di trahador y a ofrece un pakete, ya cu a dicidi di bolbe cera un departamento na Aruba y mande pa Trinidad, locual ta haci cu e trahadornan di e departamento ey, ta bira di mas.
“Esey pa e trahadornan ta inaceptable. Esaki ta algo cu ta sosodiendo pa basta aña caba y ta obvio cu RBC a bay di un banco cu tabata tin hopi filial na Aruba, pa aworaki un oficina a keda, y mientras tanto hopi personal a wordo manda cas”, Figaroa a subraya.
El a reitera locual cu su colega Dirksz a bisa, cu ta prerogativa di un empresa con e ta hinca su organizacion den otro, y cuanto hende e ta emplea.
No obstante, na momento cu e mandamento di hende cas tin efecto riba esnan cu ta keda na pia di trabao, esey ta bira un problema tanto pa e trahador como pa e sindicato cu ta para pa nan derechonan, y no ta asina cu e trabao ta wordo supuestamente elimina, cu hendenan ta bay cas, y despues e peso di trabao pa esnan cu ta keda, ta sigui ta aumenta di un forma cu e productividad di e trahador ta cay atras hopi, y e ora ey no por papia di un trabao decente, asina Hose Figaroa, Presidente di FTA a señala.
“Un trahador ta bin ocho ora cu no ta yega pa haci e cantidad di trabao cu tin cu haci, y esey tin efecto riba su salud fisico y mental, y esaki ta algo cu simplemente, no por mas.
“Dus, e trahadornan a yega na un punto unda awa a pasa hariña. E cosnan aki no ta aceptable y a dicidi di tuma accion di un ora, y manda un mensahe no solamente pa e gerencia aki na Aruba, pero tambe pa e gerencia cu tin afo, pasobra RBC ta un banco cu mayor parti ta maneha di afo, cu e situacion aki mester para”, Figaroa a subraya.
El a agrega cu den e reunion di Dialuna y den e reunion aki nan kier yega na palabracionnan concreto pa loke ta trata eliminacion di cupo di trabao, pero tambe e forma con ta bay garantiza e paz mental y un ambiente di trabao pa e trahadornan di RBC.
Figaroa tin elogio pa e trahadornan aki, cu ta haci hopi esfuerzo pa mantene e calidad di servicio y e miedo cu FTA tin ta cu e banco por perde mas cliente, pasobra e trahador bao presion no por duna e servicio cu nan tabata duna antes. E tiki trahador cu a resta tin cu deal cu tur e arsenal di cliente, lo cual por hiba e cliente na malcontento cu e ta bay. Esey, a largo plazo lo tin como consecuencia tambe cu e entradanan di e banco lo baha y FTA ta haya su mes cu peticion pa reduccion di gasto, y retiro di trahador.
“E ta bira un circulo vicioso, cu si no tuma paso pa sali for di dje, esaki ta bay tin consecuencia tanto pa e banco como e trahador mes”, Presidente di FTA, Hose Figaroa, a señala.
