Aruba Bank tabata patrocinador di Torneo Internacional di Tenis Junior TIHTA

ORANJESTAD (AAN):  Aruba Bank ta contento di por a duna sosten na desaroyo di tenis junior den e region door di patrocina Torneo Internacional di Tenis Junior TIHTA.

Como parti di e colaboracion aki, Aruba Bank a bira co-patrocinador di e torneo, cu a tuma lugar for di 1 di juli te cu 7 di juli 2023, na Aruba Racquet Club.

            Tennis Aruba, cu su mision pa promove y mehora e deporte di tenis, a brinda oportunidad pa hoben cu talento pa por competi na nivel internacional pa por logra punto di ranking di ITF. E torneo di TIHTA ta sirbi como plataforma pa hungadornan di Aruba por midi nan habilidadnan contra hungadornan internacional, pa por demostra nan amor pa e deporte y posiblemente sigura un beca di universidad na Merca.

            E sponsor di Aruba Bank na e torneo ta demostra su compromiso pa duna sosten na crecemento y desaroyo di tenis na Aruba. E Torneo Internacional di Tenis Junior TIHTA, cu a trece casi 200 participante, tanto na nivel nacional como internacional, a demostra di ta un exito tremendo.

            Aruba Bank ta keda comprometi pa haci donacion cu ta impacta desaroyo di deportenan y hubentud na Aruba na manera positivo.