Geoffrey Wever satisfecho cu e super acogida pa curso Finanzas Den Mi Hogar na Savaneta

ORANJESTAD (AAN): Un total di 50 ciudadano a ricibi nan certificado di participacion na e curso Finanzas den mi Hogar den districto di Savaneta.

Esaki ta bira e di cuatro grupo di ciudadanonan den diferente districto cu a participa na e curso Finanzas den mi Hogar. Finanzas den mi Hogar ta un proyecto cu ta worde organiza y financia door di Minister Geoffrey Wever y desaroya door di Fundacion Plan di Bida.

   Savaneta ta bira e di cuatro districto cu a participa na e curso gratis riba educacion financiero. Durante cuatro sesion a trata temanan manera con pa ta efectivo den bo hogar, pago di debe, inverti den futuro y presupuesto. Riba cada tema participantenan a ricibi mas informacion y tips riba maneho di entrada y gasto. Ta importante pa ta consciente riba nos entrada y gasto y con esaki ta afecta nos stabilidad y metanan financiero. E curso ta enfoca pa bira critico riba nos decisionnan financiero y tambe riba nos actitud cu por afecta sin cu nos sa, e cartera.

   E curso ta forma parti di maneho economico di minister Geoffrey Wever pa stimula cu consumidornan di Aruba bira mas consciente y critico. Un consumidor consciente y critico ta e fundeshi di un economia inclusivo y duradero. Facilita e curso gratis aki lo duna e ciudadano, e consumidor e habilidad riba e maneho financiero di su entrada y gastonan. Un habilidad cu ta necesario pa evita problemanan financiero manera debe y biba mas miho y mas comodo.

  Ta importante pa nos ciudadanonan por yega y participa na e curso. P'esey e meta pa ofrece e curso Finanzas den mi Hogar gratis, den tur districto y cerca di nos ciudadanonan segun minister Geoffrey Wever.

  Minister Geoffrey Wever ta gradici cada ciudadano cu nan participacion, un participacion cu sigur lo contribui na nan desaroyo y bienestar personal.

   DIARIO a compronde cu e siguiente distrito, na unda e curso Finanzas den mi Hogar lo tuma lugar, ta Noord. Registracion ta completamente gratis, pero cupo ta limita. Pa mas informacion por tuma contacto cu Fundacion Plan di Bida na telefon 568-8848.