Carolina Merryweather-Raven, presidente AFBA:
ORANJESTAD (AAN) – DIARIO a entrevista señora Carolina Merryweather- Raven, presidente di AFBA (Aruba Food & Beverage Association), tocante e situacion di awa sushi cu ta bin ariba for di e riolering, den e area di Palm Beach mas tanto.
Carolina Raven a expresa cu no ta un secreto na Aruba, cu tin un problema grandi cu ta causa un holo insoportable, y e miembronan di AFBA, particularmente, ta afecta cu esaki.
El a splica cu e miembronan cu tin restaurant pafo, riba e beach, riba nan terrace practicamente no por sirbi e guest mas e dianan cu tin back up, pasobra no solamente pasobra no por wanta e holo, pero ta bin yen di musca y sangura. Esaki ta un “safety concern” y ta algo cu pa e Asociacion di F&B ta di urgencia pa haya un solucion.
Raven a señala cu nan tin hopi tempo cu e problema aki, pues e no ta algo di nobo, pero si nan a ripara cu siman pasa, tabata tin back up Diahuebs y Diabierna y cu e situacion ta birando peor.
“Nos a haya na December un carta colectivo cu a bay na diferente stakeholders di Horeca y AFBA tambe a haya uno. Nos a manda e comunicado aki pa nos miembronan, y mi ta kere cu e carta ta duidelijk, un advertencia, pero aworaki nos ta na Juli, y e carta di advertencia a tuma lugar na December. Kico a pasa entre December cu awo? Nos no ta mira mehoracion, nos a haci apelacion caba na nos miembronan, nos a manda diferente documento di concientizacion caba pa nos miembronan, y nan tin informacion corecto aworaki”, Carolina Raven a señala.
E ta kere cu tin un hende cu ta haciendo algo cu no ta bon, kizas e no sa e manera corecto di maneha desperdicio, of e sa pero no ta worry, of no ta preocupa y ta pensa cu esaki no ta importante.
“No ta solamente e vet cu ta bay den e sistema pero tur e obhetonan cu ta wordo tira den e sistema di riolering, cu ta cu ta causa e back up. Nos infrastructura no ta carga loke nos tin, specialmente den e area aki, y e companianan tur dia ta bib’e y nan tin nan apelacion na e instancianan concerni, pa loke ta e parti di e sistema mes” Carolina a expresa.
El a haci un yamada na tur esnan cu tin un restaurant pa nan ta conciente cu locual nan ta haciendo ta causando daño na e area aki, y bo por bira cara pa no wak, pero e ta haciendo daño na e producto Aruba. “Pasobra e comentarionan cu bo ta wak riba e diferente foro ta cu tin mal holo akinan, cu no por cana ni bin beach akinan, pasobra tin mal holo. Esaki ta un mal propaganda pa nos Isla”, Carolina a remarca.
