Aruba Bank ta sostene e proyecto “Raton Sabi 3D Printing Project” di Trupial Kleuterschool

ORANJESTAD (AAN): Trupial Kleuterschool ta bisa danki na Aruba Bank pa ta un sponsor balioso di su proyecto innovador “Raton Sabi 3D Printing Project.”

Danki na e apoyo di Aruba Bank, e scol a logra amplia e laboratorio di computer Raton Sabi cu tecnologia moderno di impresion 3D. E iniciativa aki ta yuda studiante entre edad di 3½ te 6 a explora creatividad, con pa resolve problema, y tecnologia den un manera practico y interesante.

“Nos ta sumamente agradecido na Aruba Bank pa nan contribucion,” Juffrouw Josrin, cabesante di Trupial Kleuterschool ta comenta. “Nan sosten ta duna nos e poder pa ofece experiencia cu tin balor pa un mucha, cu ta stimula “skills” nan di siglo 21.”

E compromiso di Aruba Bank pa cu educacion y inovacion ta continua di tin un impacto positivo den e comunidad Arubano, stimulando desaroyo di e mente di nos muchanan via tecnologia y creatividad.