‘Ami y e famia tin Fe cu e caso aki lo cana su caminda manera mester ta’

Max Elias Ng, representando e famia Lanoy:

• Aunke e lo dura largo nos tin pasenshi y Fe den Dios 

ORANJESTAD (AAN) Max Elias Ng a representa e famia di e hoben Ayden Lanoy den Corte, Diabierna mainta, den calidad di activista. El a splica cu e ta para pa husticia y ainda esaki ta e caso; awe tabata tin Regiezitting, unda basicamente a splica cu ambos partido tabata tin e chens pa trece nan deseonan dilanti, pa loke ta trata mas investigacion cu mester tuma lugar.

   “Y esaki a tuma lugar, sinembargo Huez a ‘wise nan up’ mirando cu na su manera di pensa e dossier ta cla caba. Ami y e famia ta sinti hopi Fe cu e caso aki lo cana su caminda, y aunke e ta dura largo cosnan pura no ta sali bon tampoco. Nos tin e pasenshi, nos tin e Fe no djis den e sistema hudicial sino tambe den Dios, cu por cierto ta wantando e famia aki na halto, y tambe ta tene nos lucha bibo!” Max Ng a bisa.

   El a agrega cu nan ta wak cu e caso aki ta canando su caminda, nan ta feliz cu e cooperacion di Ministerio Publico y di e Huez. “Y na final di dia e huicio berdadero ta den man di nos Dios” Max Ng a manifesta.

   “Como representante di e famia, naturalmente, mi por wak un tiki mas cercano e dolor cu nan ta sufri como famia; sinembargo, nos tin cu tene cuenta tambe cu e caso aki hopi hende ta bisa cu ta un caso simpel, nan a djis tira mata ya cla, condena nan; no!

   Di otro banda e sospechosonan tin e derecho riba un proceso husto. Anto na e manera cu nos ta wak’e e proceso husto ey no ta para na caminda si loke nan a haci ta bon of malo; na fin di dia hasta cu un huicio cu ta husto pa nan, toch nos ta kere cu e Huez lo yega na un condena cu ta proporcional y cu ta mara na e gravedad di e situacion. Anto, si e tin cu tuma su tempo, nos ta respeta esey, y nos ta keda cana firme dilanti cu Fe den e husticia”, Max Ng a conclui.