Aruba Bank ta duna su sosten na “The Roots of Renewal Project”

Como parti di Aruba Doet

ORANJESTAD (AAN): Aruba Bank ta orguyoso di a forma parti di 'The Roots of Renewal Project', un iniciativa organisa como parti di Aruba Doet cu ta tuma lugar anualmente. E proyecto aki a trece bida, bunitesa y un conexion nobo den e bario di Mabon durante un dia di colaboracion, creatividad y e amor pa duna un man.

Cu e apoyo valioso di 11 boluntario di Aruba Bank, e grupo a bin hunto bou di e lema “Bin yuda nos transforma y embeyece e parke di Mabon”. E iniciativa ta enfoca pa crea un espacio alegre y sostenibel pa e habitantenan di tur edad.

Durante e shift di mainta, Aruba Bank su boluntarionan a duna un man pa haci e tereno di e parke limpi, yuda verf y prepara mesa, stoel y lugar di weganan pa un evento comunitario yen di placer y interaccion. E energia y dedicacion di e team a set e base pa un celebracion feliz.

Aruba Bank ta keda comprometi na sostene proyecto cu ta mehora bida y fortalece e laso entre barionan. E proyecto aki ta refleha e banco su balornan di sostenibilidad, educacion y empoderacion. 

Aruba Bank ta sumamente orguyoso di su team di boluntarionan cu a duna nan tempo y energia pa yuda haci e parke di Mabon un lugar mas bunita.

Aruba Bank kier gradici tur boluntario, organisado y miembronan di comunidad cu a contribui na e exito di “The Roots of Renewal Project”. Hunto nos ta sigui traha riba un Aruba mas briyante y uni.