Fundacion Lanta Papiamento
ORANJESTAD (AAN) Carlos Croes, tambe a hiba palabra durante e conferencia di prensa yama pa Fundacion Lanta Papiamento (FLP) y a menciona cu Fundacion Lanta Papiamento ta di fiesta, pasobra nan ta celebrando tambe, dia 21 di Mei awo, cu 16 aña pasa e Fundacion aki a nace pa reinforza e Idioma Papiamento.
“Nos ta ripara cu vooral den nos hubentud, nan ta hinca yen di palabra na Hulandes y na Ingles, y nos Papiamento ta bira cada bez menos. Y si nos ta sigui den e estado aki y no haci nada, aki 50 of 60 aña Papiamento no ta existi mas.
“Y, Papiamento ta nos Idioma. Ta loke nos ta uza henter dia na cas, nos ta uze den nos negoshinan y tur caminda. Di con nos tin cu bay influencia otro idioma den nos idioma. Pues, esey ta loke nos ta bay purba di cambia y nos ta cuminza e dia aki cu nos ta celebra nos 16 aña tambe y cu 22 aña pasa cu Papiamento a wordo oficializa como Idioma Nacional di Aruba, y pa e dia ey nos ta bay tin un programa masha bunita mes”, Carlos Croes a indica.
El a informa tambe, cu e dia aki ta bay tin algun hende masha importante cu ta bay bishita e Fundacion e dia-atardi ey. E celebracion ta cuminza pa 6’or di atardi unda cu nan ta spera cu e publico lo drenta. Pa 6.15 or Maestro di Ceremonia, cu ta bay ta Ronny Arends, ta haci e apertura di e anochi. Pa 6.20 lo tin un poema di señora Selvia Lumenier. Pa 6.30 lo tin un tiki di musica, cu lo dura mas of menos 10 minuut. Pa 6.40 lo tin un charla masha importante, cu yama ‘E balor di Papiamento’. Kico a logra te awo y kico mester haci ainda. E ta bay ta dirigi pa Drs.Joyce Pereira, presidente di e Fundacion. Pa 7.15 lo tin ‘E Fruta Paradise’ cu ta un cuento di origen cu Ramon Todd Dandaré a haci na Cabo Verde, dos siman pasa, y tabata un exito total. Pa 7.30 Carlos Croes lo declama un poema chikito di un persona cu a bin biba na Aruba, cu a tuma tanto amor pa Aruba cu e ta traha hopi di su poemanan den Papiamento. Pa 7.50 lo rindi homenahe na algun persona pa yuda bira oficial na Aruba, y pa 8’or y mey lo cera anochi cu musica, gradicimento y clausura.
