Aruba Bank a haci donacion di “tablets” na Stichting Hunga Teca

Na beneficio di scolnan pariba di brug

ORANJESTAD (AAN):  Aruba Bank a haci donacion di tablets na Stichting Hunga Teca, un fundacion cu ta ofrece mucha entre 0-12 aña e oportunidad pa desaroya nan abilidad cognitivo, creativo, social.

            E tablets en cuestion ta wordo fia na scolnan basico, pariba di brug, pa asina e alumnonan por uza e tabletnan den klas ora di lesnan special.

            Na Hunga Teca, e mucha, acompaña pa un mayor, abuelo/a of educador por pasa pa fia un co’i hunga of wega educativo. Ta comproba cientificamente cu hunga cu co’i hunga y wega, ta contribui na un desaroyo total di un mucha.

            Durante un ceremonia chikito na scol Colegio Cristo Rey na Brazil, representantenan di SKOA, Aruba Bank y Stichting Hunga Teca a haci entrega di e tabletnan na e representantenan di e scol.