PALM BEACH: Su nomber ta Dr. Flor Karina Contreras, y a caba di gradua como Docter Ciruhano na Venezuela,
y como 6 luna pasa a bay biba na New York buscando un mihor futuro. Pero el a perde su bida durante vakantie na Palm Beach county na Florida.
Polisnan a wordo yama pa acudi na un cas di huur di Airbnb na Loxahatchee pa 6:30 am, despues cu amigonan di e victima di 27 aña di edad a bin haye boca abao ta drief den e pool.
Autoridadnan a bisa cu e Docter hoben tabata di vakantie cu algun amigo na e cas ey cu nan a huur di Airbnb. E ultimo biaha cu nan a mir’e, e tabata sinta banda di pool pa 2:20 di marduga. El a wordo haya door di un di nan pa 6:25 am boca abao den awa. Detectivenan a bin haya sa cu e muher no sa landa.
Informenan di Univision y Telemundo a bisa cu Sheriff di Palm Beach County a bisa cu aki no ta trata di un investigacion criminal, pero nan ta wardando resultado di docter forensico pa determina e causa exacto.
E Docter hoben aki ta procedente di estado Tachira, y su famia awor ta buscando yudanza pa trece e restonan mortal bek pa Venezuela, pero nan no tin suficiente recurso economico pa haci esey. E restonan mortal aworaki ta na un funeraria na Miami wardando kico pa haci cune.
Un intento pa recauda fondo a wordo crea riba GoFundMe.com pa purba yega na e $17.000 necesario. Te cu Diadomingo anochi, nan tabata acercando 7 mil Dollar ya caba recauda.
