Aruba Airport Authority N.V. sigui promove y contribui na Metanan di Desaroyo Sostenibel Global

Siman di Accion 2025

ORANJESTAD (AAN): Aruba Airport Authority N.V. (AAA) orguyosamente a organisa diferente actividad pa sigui promove y contribui na e Metanan di Desaroyo Sostenibel Global (SDG) di Nacionnan Uni (UN) durante un Siman di Accion 2025. E aña aki, e Siman di Accion di Metanan di Desaroyo Sostenibel di AAA a tuma luga for di 22 te cu 25 di september 2025 y tabata basa riba e tema di e aña aki; Partnerships for Sustainable Development and Climate Solutions, cu un enfoke special riba e Environmental Management System (EMS) nobo di aeropuerto y introduccion di un Sustainable Waste Management na aeropuerto di Aruba. 

E strategia ambiental y sistema di maneho ambiental nobo di AUA Airport ta encera 6 pilar y ta destaca e compromiso pa continuamente reduci su impactonan ambiental, baha polucion y desperdicio, proteha medio ambiente y mehora nos eficiencia ambiental den y rond di aeropuerto. 

Como cu maneho di desperdicio ta un di e aereanan di enfoke pa aeropuerto, a tene diferente sesion di conscientisacion y training pa e empleadonan di AAA y tambe pa henter e comunidad di aeropuerto pa e proximo introduccion di e bakinan di separacion di desperdicio den henter e terminal di aeropuerto. 

Ademas a tene sesionnan adicional door di UNESCO School Aruba - Prinses Amalia Basisschool resaltando nan esfuerso den reciclahe di desperdicio, educando e alumnonan pa tambe duna bek na comunidad. Living Soil Aruba a destaca e importancia di Syntropic Agriculture, un metodo uza pa cultiva cuminda, restaura ecosistema y yuda e comunidadnan pa reconecta cu naturalesa. 

E empleadonan di AAA tambe por a yuda Living Soil boluntariamente na dos scol den oranan di mainta dunando bek na comunidad. AAA lo sigui promove y contribui na e SDGnan di Nacionnan Uni a traves di proyectonan y actividadnan cu proposito cu ta beneficia e comunidad y e comunidad di aeropuerto. 

E Siman di SDG di e aña aki a destaca e compromiso di aeropuerto pa reduci nos impacto ambiental y pa involucra, curasha y promove practicanan sostenibel pa medio di colaboracion cu e stakeholdernan clave y henter e comunidad di aeropuerto.