Señora Rulienne Arends di FADA:
*Tres storia real pa educa y inspira comunidad
ORANJESTAD (AAN) – Señora Rulienne Arends, trahador preventivo di Fundacion Anti Droga Aruba (FADA), a anuncia cu gran emocion cu un biaha mas FADA lo lansa un di su programanan mas aprecia den comunidad: un serie di documentarionan basa riba bida real. E proyecto ta parti di e compromiso continuo di FADA pa educa, crea empatia y inspira e comunidad Arubano.
Segun señora Arends, e edicion di e aña aki ta enfoca riba un tema crucial: salud mental, den conexion cu Dia Mundial di Salud Mental, cu ta wordo celebra mundialmente dia 10 di oktober.
Pa haci e documentarionan aki posibel, FADA a busca personanan cu ta dispuesto pa habri nan curason y conta nan storia personal. E storianan aki ta real, profundo, y ta duna un les pa tur hende cu ta lucha cu su propio desafio.
Tres persona cu curashi a comparti nan experiencia personal, incluyendo e lucha, e recuperacion y e speransa. Nan ta comparti unda nan a busca yudansa y ta duna conseho na esnan cu por ta den situacionnan similar.
Awe diaranson, 1 di oktober 2025 – 9:00pm, señora Kylie Hernandez Croes ta conta su storia riba e topico "Borderline Personality Disorder". Dia 8 di oktober 2025, señora Shayara Geerman ta comparti su lucha como mama, profesional y cuidadora di un yiu cu un condicion cronico, y con esey a impacta su salud mental. Dia 15 di oktober 2025, señora Verenuska Rincón ta comparti su experiencia riba e tema di “eating disorder”, un tema cu a impacta su bida personal y social.
Transmision di e documentarionan lo ta via Facebook di FADA Aruba, TeleAruba, 24ora, Masnoticia, Viral297 y Links TV Canal 3 pa 9:00 pm.
