Aruba a registra solamente 38 mm di yobida riba Diaranson

Nada di pronostico di 75 mm te cu 127 mm a bira realidad

ORANJESTAD (AAN): Loke a pasa pazuid di islanan di ABC riba Diaranson tabata algo similar cu un Ola Tropical.  Esey nifica cu Aruba ta dichoso un biaha mas di a evita cualkier calamidad, y no a sinti nada di e pronostico di awaceronan torencial, ni biento fuerte.

   National Hurricane Center a calcula cu Aruba, Bonaire y Curaçao lo a haya entre 75 mm te cu 127 mm di awacero door di pasada di e disturbio tropical aki.

   Pero en realidad?  Oficialmente Aruba a haya solamente 38.4 mm di yobida.  Bonaire a ricibi 26.4 mm di yobida.  Curaçao a haya 31.0 mm di yobida.

   Un conocido comerciante kende ta biba den area di Noord, a laga sa cu na su cas e tin un ‘rain-gauge’, y aki el a registra 33 mm di yobida.

   Algo asina a wordo raporta tambe na Trinidad & Tobago, unda a registra 45.7 mm.  Na Isla de Margarita (Venezuela) a registra apenas 17.0 mm di yobida.

   Na Trinidad & Tobago tabatin algun area cu a keda sin coriente, pero nan a wordo restaura hopi rapido bek.

   Isla de Margarita a raporta cu nada a socede, y e siguiente dia ya tur cos a bay bek na normalidad.

   Na estado Falcon, unda e Disturbio Tropical pasa riba dje, segun e Gobernador ya riba Diahuebs tur cos tabata bek na normalidad.  Nada extremo a socede, y tur personal riba alerta no mester a wordo ni activa.  Djis yobida normal tabatin, y nada di biento.

   Esaki por a mira tambe cu apenas e Damnan a yena un tiki, y algun spulado a keda basha cu awa cu tabata pasa bao di nan.  Esey a demostra cu e rooinan a wordo bon drecha door di DOW y nan personal balente.

   Di un banda ta bon cu e Damnan no a yena full, como cu tin 152 dia ainda cu a resta pa fin di Temporada di Horcan 2022.  Warda tur boter di awa cu bo a cumpra, bateria, etc., pasobra a mustra cu e temporada aki lo ta uno hopi activo.