ORANJESTAD (AAN): Nada di e pronostico di 75 pa 127 mm di awacero a bira realidad.
Aruba a prepara su mes bon, y pa puro suerte e Disturbio Tropical cu a pasa pazuid di e isla, a haci esaki cu djis awacero modera y no hopi biento.
Aruba a haya apenas 38.4 mm di yobida. E ta mucho mas cu loke Bonaire y Curaçao a haya.
Diaranson pa 8:00 pm, e centro di e Disturbio Tropical tabata na 11.9º Nort y 69.7º West, cu ta igual cu 59 km Zuid-Zuidoost di Baby Beach na San Nicolas. Esey ta igual cu 11 km pariba di pueblo di Adicora na peninsula di Paraguana.
E momento ey segun National Hurricane Center, e tabata produci ainda biento maximo sosteni di 65 km/h. E tabata moviendo west cu 33 km/h.
Diaranson pa 11:00 pm, e centro di e Disturbio Tropical tabata na 12.0º Nort y 70.6º West, cu ta igual cu 84 km Zuidwest di Punta Brabo di Aruba, y djis 51 km Noordwest di Punto Fijo.
E momento ey segun National Hurricane Center, e tabata keto bay cu biento maximo sosteni di 65 km/h, y siguiendo bay pabao cu 33 km/h.
E punto di mas cerca: Esaki nifica, cu e distancia mas cortico di e centro di e Disturbio Tropical pa Aruba a socede 9:00 pm, ora e tabata apenas 54 km net zuid di Baby Beach, na San Nicolas, Aruba.
Exactamente 11;00 pm, e Tropical Storm Warning pa Aruba a wordo descontinua.
E maltempo aki a sirbi toch como un ‘training ideal’ pa asina mira con bon e isla ta prepara! Pueblo a sa di sigui bon e instruccionnan duna door di autoridad y expertonan. Pero di otro banda, tin di lamenta cu un Disturbio cu a keda di comienzo te cu awor cu mesun status di Ola Tropical, kizas no mester a crea un alerta asina extremo pa e area aki. Es mas, e temporada aki di Mei, Juni y Juli no ta uno caminda Horcan normalmente ta mobiliza den e area asina zuid den Caribe. Esey por pasa mas bien den Augustus, September y October.
Pero toch, ainda tin 152 dia cu ta resta di e Temporada di Horcan 2022. Haci uso di e experiencia obteni Diaranson pa asina bo sa con pa actua si acaso un ciclon mas poderoso pasa den e area aki.
Pues warda e boternan di awa extra cu bo a cumpra, pasobra e lo por ta util den futuro cercano. Y manera por mira riba e potret aki di loke tabata haci dilanti Palmera Quality Products riba Smith Boulevard, ta bon idea pa warda e saconan di santo pa uso den futuro cercano.
