Gobierno sorprendi cu anuncio di WEB Aruba N.V. relaciona cu aumento di tarifa di awa

Aumento no ta conta cu aprobacion di Gobierno

ORANJESTAD (AAN):  Diahuebs mainta, e compania di utilidad WEB Aruba N.V. a anuncia un aumento di tarifa entrante awe diabierna 1 di Juli 2022. Nan ta alega cu esaki ta den cuadro di e aumento drastico di combustibel (HFO) segun desaroyonan mundial, despues di e pandemia. Esaki a empeora cu e guera na Ucrania, e compania a indica.

            "WEB Aruba a sa di absorba e aumento aki door di aloca su reservanan. A yega na un punto cu esaki no ta responsabel mas pa nos compania, cu tin un rol vital pa nos isla.

            Clientenan lo ripara e aumento pa prome biaha den nan cuenta di awa di augustus 2022. Hunto cu e aumento di tarifa di awa ta introduci un structura di tarifa nobo" . Adhunto e tabel cu bista di e cambio cu WEB Aruba ta bin cu ne.

            Mientrastanto, den conferencia di prensa di Gobierno y Crisis Team diahuebs merdia, Prome Minister Evelyn Wever-Croes a expresa cu "gobierno a wordo desagradablemente sorprendi cu e anuncio di WEB awemainta sin cu a haya aprobacion di gobierno mientras cu ta na mesa cu WEB y ELMAR riba e tema aki".

            No ta un secreto cu e companianan a pidi pa hisa e tarifanan y gobierno a bisa nan cu kier mira di nan banda cierto trabaonan wordo haci, e mandatario a enfatisa.

            El a agrega cu na ta mesa cu nan y a sinta cu nan e siman aki prome cu mester a atende cu e crisis di tempo. E palabracionnan no ta cu diahuebs nan lo mester a sali anuncia algo asina.

            E caso aki aworaki ta den man di Minister Glenbert Croes cu ta Minister di Energia y asina cu e tin algo di bisa e lo duna e informacion aki, a señala.

            E mandatario a finalisa bisando cu e no ta kere cu WEB ta bay haci algo asina pasobra e ley di LNT (Landsverordening Normering Topinkomens) a caba di wordo aproba den Parlamento.