Aruba a perde un gran musico y deportista cu fayecimento di Ciro Marquez

ORANJESTAD (AAN): Recientemente e conocido Ciro Marquez a fayece, y pa hopi hende esaki ta un gran perdida, specialmente den mundo musical.

   DIARIO a compronde cu Ciro a nace riba 30 di januari 1949 y tabata e yiu homber mayor di famia Marquez.  Aki ta presenta un relato di su bida y su gran logronan.

   Musica: Di chikito el a demostra di tin talento pa musica, especialmente pa piano. Esey a haci cu su mayornan a cumpra un piano p’e y tur dia musica di piano tabata resona den bario di Socotorowijk, cu depues a haya otro nomber.

   El a siña toca y domina piano di su mes, den esaki e tabata un autodidactico. Mas despues el a bira miembro di De Trupialen y eynan el a sigui desaroya su mes den tocamento di piano, den canto y teatro. E mes tabata composita varios di su canticanan, a lanta varios banda tanto na Aruba como na Hulanda y tabata bay den gira musical.

   Ciro a participa na varios festival, a gana y causa furor cu su composicion “Silencio”. Na Hulanda el a bay conservatorio y a sigui specialisa su mes den musica. Un di su bandnan na Aruba tabata The Young Adventurers, nan tabata train na cas di su mayornan mes of na cas di mayornan di su swa Bill Tromp e.f.m. Su banda na Hulanda tabata Grupo MESA, caminda entusiasmo ta topa entusiasmo.

   Ora drenta un luga, semper tin un menu riba mesa , y e menu di Grupo MESA tabata un combinacion sorprendente di ritmonan  Afro-Caribense manera salsa, merengue, ritmo combina, yena cu hopi sabor. Otro integrantenan di Grupo MESA ta Davey, Eddy Gezellig y Ziggy (Densel).

   Deporte: Pa loke ta deporte e tabata practica judo y karate y tabata amante di tur otro martial arts. Tanto den judo como den karate el a logra su black belt y a participa na varios competencia. E tabata train hopi cu maestro di judo Candido Tromp. Tambe e tabata den un grupo cu tur fin di siman tabata practica acrobacia riba beach. Un di e miembronan di acrobacia ta e conocido Jerry Franca.

   Fuera di esaki, el a specialisa su mes den yoga y tabata un gran maestro di yoga.

   Trabao: Despues cu el a caba universidad, el a traha na diferente compania di seguro, hasta el a bira un di e bendedonan di seguro di mas grandi den e tempo, prome cu el a bay residencia su mes na Hulanda, caminda el a keda pa mas di trinta aña.

   Na 2009 el a bolbe su isla natal, pa duna back na comunidad algo di su conocemento y tabata tene su charlanan di remedi di tera, promove Oxy Plus y haci investigacionnan riba cierto topiconan medicinal y di salud.

   Politica: Na 2017 el a subi lista politico di ReD y tabata bon amigo di tur otro politico, pero despues di e eleccion ey, el a ripara cu politica no ta p’e y el a saca su conclusion!

   Cerca su gran amigo, Johny Habibe di radio emisora Hit 94, a tene varios entrevista cu ne y e tabata duna su aporte n’e Parlamento di Pueblo cu consehonan basa riba investigacion y saca for di fuentenan fidedigno. Tabata ked aña cada ken pa scoge kico ta bon pa sum es. Na e programa radial aki, e tabata conoci como Vol = Vol y of Health Ranger.

   Amor pa bestia: Ciro su amor pa bestia tabata hopi grandi, specialmente pa cacho di rasa Fila Brasileiro. E ta bay laga atras su dos cachonan cu el a stima masha tanto, esta Ashira y Bremo.

    Medicina: Ciro tabata un gran amante di naturalesa. Na Hulanda y Alemania, el a studia natuurgeneeskunde. Y na Mexico el a studia antropologia. Su wela paterno, esta Ma Tina, tabata traha remedi di tera y tabata yuda hopi hende cu e.o. remedi di aloe, stropi di calbas y mucho mas. Ciro su meta tabata pa promove leynan cu ta proteha nos remedinan di tera y e derecho di pashent pa scoge pa remedi di tera.

   Mescos cu tur hende, e sa sinti malo y despues ta recupera manera nada n’ pasa. Semper e tabata un persona cu ta come y biba na un forma saludabel. Nunca el a sinti algo di curason, pero esaki a sorprend’e inesperadamente den exterior y el a fayece na edad di 72 aña. Ta algo cu tabata skirbi caba den e plan di nos bon Dios.

   El a fayece cu un curason trankil, manera su cantica “Silencio” ta bisa, awo e ta cantando y tocando den reino celestial!