ORANJESTAD (AAN) – CEO di Oficina di Turismo (ATA), Ronella Croes a sigui amplia den conferencia di prensa, tocante su encuentro cu Formador den cual, den dos sesion a enfoca riba dos diferente aspecto di maneho, un di nan e modelo di maneho di turismo.
Ademas el a elabora riba algun investigacion realiza pa ATA, por ehemplo diversificacion di Economia cu bista na los un poco di e industria turistico pa ta menos dependiente di dje.
Croes a señala cu ATA a haci e trayecto di facilita y lidera produccion di diferente investigacion y plannan, y tin tur e accionnan cla pa wordo implementa, pero esaki ta algo cu gobierno mester considera na un manera integral. “Pues, no solamente e ta responsabilidad di Ministerio di Turismo, pa nos guia nos turismo na un manera duradero, pero e ta un responsabilidad interministerial, y esaki ta eigenlijk locual nos kier a subraya”, Ronella Croes a splica.
El a agrega cu ATA a pone enfoke riba diferente plan, entre otro un plan cu nan a desaroya na aña 2017, cu nan ta yama e “Destination development plan, cu nan a dune e titulo di “Cu miras pa futuro” y e tin diferente accion den dje.
Na 2018-2019, ATA a traha un di dos plan cu ta e estudio di capacidad di carga cu tambe tin diferente accion den dje, y por pensa riba e hecho cu e plan aki a conclui cu mester enfoca mas riba diversifica su economia: pues, move mas y mas for di turismo tambe pa no keda depende riba e industria aki.
“E plan aki ta papia di desaroyo di diferente segmento, cu por duna Aruba mas beneficio y pa tene cuenta cu e resultado di e estudio di capacidad di carga. E ta papia tambe riba e maneho, kizas hopi selectivo y astringent, pa loke ta trata e tipo di acomodacion cu bo ta atrae, pero tambe e cantidad di acomodacion na Aruba. Mirando cu un introduccion di acomodacion por tin un impacto mas grandi riba bo fabrica social, bo comunidad, bo costonan, etc., e ta hopi importante pa nos ta hopi prudente y selectivo pa loke ta trata esaki y pa tuma decisionnan cu hopi bon evaluacion den mente, tambe”, CEO di ATA a señala.
Ronella Croes a elabora tambe tocante turismo di crusero cu tambe tin un vision den e estudio aki cu ATA a comparti durante e reunion cu Formador.
Ademas a papia di otro estudio unda tin tur contesta riba ki tipo di comercializacion Aruba mester stimula mas, ki tipo di producto mester atrae, y ki tipo di producto kizas no mester atrae mas of limita.
Encuanto e desaroyo hotelero, ATA a seña cu tin varios aspecto cu a tuma lugar, ya cu mester reconoce cu e plan di zonificacion di Aruba (Ruimpte Ontwikelingsplan) tin ya caba un maneho delinea, unda cu ta stimula acomodacion tipo boutique den e area di Oranjestad y San Nicolas, y unda cu tin un stop basicamente, den e area di Palm Beach. “Ta cosnan cu nos ta aplaudi y nos ta señala cu tin cu revisa esaki atrobe, pa wak pa keda monitorea di cerca locual ta acomodacion”, Ronella Croes a conclui no sin prome bolbe gradici pa e oportunidad di a reuni cu Formador un biaha mas unda a duna tur esnan cu tabata presente copia di ATA su ultimo plan maestro, cu ta acapara e periodo 2018-2021 y un handout cu e resultadonan reciente pa loke ta concerni desaroyo turistico, den cifranan.
