Aruba a lansa su prome Mapping Cultural y Creativo

Un anochi historico na Fort Zoutman:

ORANJESTAD (AAN):  Fort Zoutman, un di e simbolonan mas emblematico di historia di Aruba, a bira escenario di un paso historico diabierna ultimo: e lansamento oficial di Aruba su prome mapping di e Industriannan Cultural y Creativo.

E espacio tabata yen di artista, sernan creativo y partnernan di e sector. Tabata presente tambe varios dignatario, entre nan Ministro di Turismo Wendrick Cicilia, cu a califica e iniciativa como “impresionante, inspirador y emocionante”, miembronan di Parlamento y representantenan di diferente institucion gubernamental, indicando un apoyo amplio na e trayecto cu a cuminsa.

E evento, organisa pa Fundacion Go Cultura cu un ekipo visiblemente presente, a demostra un esfuerso cu hopi den sector ta considera “diferente”: un movemento realmente grassroots, guia pa comunidad mes, pero cu apoyo tecnico di Impact Hub Aruba y respaldo institucional di Aruba Tourism Authority (ATA).

Den su palabra di apertura, Edjean Semeleer, co-fundador y embahador di Fundacion Go Cultura a subraya e simbolismo di Fort Zoutman y e ambicion di e proyecto: pa prome bes Aruba lo crea un imagen cla di su curason cultural y creativo, basa riba evidencia, pa guia maneho, atrae inversion y duna e sector un stoel firme na mesa di desaroyo nacional.

“E mapping ta e acto di conecta e streanan di un constelacion bunita pa un mapa cu ta guia,” Semeleer a bisa, insistiendo cu e esfuerso no ta solamente un otro rapport mas, sino un legado pa e proximo generacion.

“Esaki ta un esfuerso cu ta nace for di e sector mes. Esaki ta e momento cu nos ta cuminsa crea un mapa pa nos futuro,” asina Arthur Loefstok, co-fundador y presidente di Go Cultura a expresa. El a comparti cu e siman aki tambe ta marca e di 8 aniversario di e fundacion. “Hopi oportunidad a wordo perdi caba den pasado door di falta di data y vision, pero e mapping aki lo finalmente duna nos claridad y evidencia. Nos no kier keda cu rapportnan cu ta djis bay den lachi. Nos kier implementacion real.”

Impact Hub Aruba, cu Mary-Ann Falconi Rasmijn na cabes, ta guia e estudio cu metodo y rigor. “E no ta solamente un investigacion academico. Nos ta creando un movecion nacional pa reconoce y balora un sector cu hopi biaha a keda bao radar,” Falconi a bisa. El a recorda cu internacionalmente e Industriannan Cultural y Creativo ta genera mas cu 50 miyon trabao y ta contribui cu 3.1% na GDP global, prueba cu creatividad ta un motor economico real.

Di banda di e sector turistico, ATA a confirma su compromiso. “Turismo y cultura no ta mundonan separa,” segun Derchlien Dijkhoff, Senior Product Specialist. “Cultura ta e alma y curason cu ta haci Aruba autentico. Esaki ta duna nos un herment pa integra e dos forsanan aki pa un futuro mas sostenibel y participativo.”

Un momento clave di e anochi tabata e discurso di Prome Ministro Mike Eman, cu a papia tanto na nomber di su gobierno como na nomber di su mes como Ministro di Cultura. E a subraya cu e mapping ta “un proyecto grandi pa Aruba,” y cu gobierno ta entusiasma pa cana hunto cu Go Cultura den e trayecto aki. El a expresa su aprecio y admiracion pa e liderato di Go Cultura y a enfatisa cu gobierno ta mira e fundacion como un aliado strategico den desaroyo cultural y economico di nos pais.

Na final, un brindis colectivo a seya e anochi. Varios di e artistanan presente a bisa cu “pa prome bes, nos ta sinti cu e sector mes ta formando su destino.”

Kico ta e Mapping di e Industrianan Cultural y Creativo?

Kico e ta? Un inventario y analisis structura pa sa ken, kico y unda e ecosistema creativo ta (artistanan, empresa, espacionan, organisacionnan), hunto cu su puntonan fuerte y su gapnan. E meta: evidencia solido pa maneho, inversion y decisionnan.

Con e ta wordo haci? A traves di encuestanan, entrevistanan y sesionnan cu gremionan. Pues un proceso participativo. Si bo ricibi un yamada of un encuesta, por fabor participa. Bo bos y bo datonan ta importante pa e mapa.

Pa kico e ta? Pa move for di pasion pa strategia. Guia maneho publico, dirigi inversion, y fortalece e laso entre cultura y turismo pa construi un oferta mas autentico y sostenibel.

E mapping no ta un rapport cu lo keda den lachi. Segun Go Cultura, e lo sirbi como guia pa maneho, strategia, pa inversionistanan, y mas importante, pa e comunidad creativo mes. Un compas pa nos cultura sali for di sombra y bira e wes’i lomba di un futuro mas resiliente, sostenibel y autentico.