Tisa LaSorte, Presidente di AHATA:
ORANJESTAD (AAN) – DIARIO a acerca señora Tisa LaSorte, Presidente di Aruba Hotel and Tourism Association (AHATA), tocante e tema di azeta di cushina cu ta bay den e sistema di riolering na Palm Beach, cu ta causa mal holo pa motibo cu e ta obstrui e sistema y cu ta mustra cu e ta causa pa hotelnan, mall, restaurant of barnan.
LaSorte a señala cu esaki ta un problema masha grandi cu ta pasando for di hopi tempo caba, cu tin un verstop cu ta pasa y awa sushi ta lanta riba caya. Esey ta causa cu tin restaurant ta perde business, pasobra hendenan no por bin eynan pasobra e ta hole hopi malo, pero tampoco turistanan por cana den e lugar of autonan no por pasa eynan, debi na e holo cu ta hopi desagradable, y esey ta haci Aruba mustra malo tambe.
“Nos ta suppose di ta un pais avanza cu no mester tin e tipo di problemanan aki. Nos (AHATA) tin entendi cu tin dos cos ta pasando: 1: cu frecuentemente nan ta haya grease den e sistema y esey ta haci cu nan ta verstop y 2: cu ora di yega na e planta mes na e plan pa tratamento di sushi, e ta kibra tambe e proceso cu e ta pasa. Esey ta pone cu e proceso mes di haci awa sushi, limpi, of mas limpi, no ta procesa bon. Pues, tin varios problema cu esey”, Tisa LaSorte a señala.
Otro cos cu nos tin entendi a, cu e infrastructura tambe mester wordo mehora. El a splica cu esey ta algo cu, supuestamente, ora cu a hay renova e boulevard, cu ta pasa straight dilanti di e hotel y restaurantnan ey, nan lo a pone tuberia nobo mas hancho cu tambe ta yuda y hasta ta suppose cu nan ta bin cu otro proyecto, unda nan ta cambia e direccion di algun tuberia, pa no tur cos ta bay den mesun caminda; pero AHATA no sa pakico esey no a sosode ainda.
“Nos no sa e fecha cu nan ta cuminza cu e dos proyectonan aki, cu nos ta kere tambe ta necesario y importante. Mientras tanto, tin e hecho cu aparentemente, tin companianan cu hendenan ta laga e azeta pasa den e sistema di riolering, locual ta haci e situacion peor. Tur hende mester coopera pa nos salba nos mes den e problema aki” LaSorte a subraya.
AHATA a haya carta y nan a manda carta pa su miembronan den restaurant y hotel, pero mester corda cu no tur restaurant ta miembro di e asociacion y tin masha hopi restaurant den e area aki, señora Tisa LaSorte a comenta.
