Aruba a gana tres premio di mihor trahe di fantasia na Republica Dominicana

ORANJESTAD (AAN): Muchanan di Aruba sobresali cu nan trahe nan di fantasia diahuebs anochi na Festival del Talento y la Belleza Internacional na Republica Dominicana.

            Dunando un show di carnaval manera cu Aruba so por haci, Aruba a sa di gana tres premio di mihor trahe di fantasia. E publico presente a apoya nan cu hopi amor y cariño.

            Un biaha mas Aruba su trahenan di fantasia a luci y e fantasia di vlinder, solo y aloe a trece e fantasianan di Aruba su naturalesa riba escenario.

            Tanique cu su fantasia di vlinder, Thaheeli cu su fantasia di e solo cayente di Aruba y Annabell cu e trahe di fantasia di Aruba su aloe a logra bay cu titulonan maximo den categorianan Miss Teen Model International, Mini Model International y Little Beautiful of the World respectivamente.

            Tin cu remarca cu e trahe cu tabata representa e perla di Caribe Aruba cual a wordo presenta pa Maya Gordon tabata impresionante y impactante, y sigur den nos concepto tabata merece di ta entre e ganadornan. Good job Maya cu sigur a sa di haci un impacto impresionante bailando cu e dushi ritmo di Aruba su carnaval.

            Un pabien tambe ta bay na e designer nan cu ta Roberto (Boedoem), Carlos y Anthony pa nan aporte na nos representantenan na Rep. Dominicana.

            Den e otro categorianan Republica Dominicana y Isla Catalina a bay cu e premionan maximo di trahe di fantasia. Ayera Diabierna tabata tin e competencia di talento di cual Thaheeli Geerman cu ta nos Mini Model a participa den e competencia aki y tambe diabierna tabata tin e entrevista cu huradonan.           Awenochi lo tin e gran anochi final, dus Aruba completo ban sigui apoya nos muchanan.