Muchanan di algun scol basico a haya rapport eroneo

Aparentemente tabata tin un fout den e sistema

ORANJESTAD (AAN): Un gran grupo di mayor di diferente scolnan di Dienst Publieke Scholen (DPS) a haya un sorpresa desagradabel ora a ricibi rapport di fin di aña escolar di nan yiunan.

            Por a constata cu por lo menos  tres scol di DPS locual ta Colegio Conrado Coronel, Scol Primario Kudawecha, y Scol Basico Washington, henter e klasnan a ricibi rapportnan eroneo y cu e rapportnan aki a wordo manda cas cu firma di ambos maestro/maestra y cabesante di scol.

            Aparentemente tabata tin un fout den e sistema di LVS, unda e calculacion final di cifra average no tabata klop.

            Claro cu tur sistema tin posibilidad di haci un eror, pero locual ta alarmante ta cu ni maestronan di scol ni cabesantenan di scol a ripara esaki, a firma y manda cas tur rapport.

            Scolnan a pidi e rapportnan eroneo bek pa drecha nan. Algun mucha lastimamente ta keda sin haya nan rapport corecto na tempo.

            Mayornan ta pidi cabesantenan di e scolnan aki pa un splicacion y ta spera cu e negligencia aki no lo pasa mas.