ORANJESTAD (AAN): Varios alumno di Colegio EPI a haya e sorpresa desagradable, cu scol a cera y nan no a haya Rapport.
Y tur e culpa a wordo tira riba algun docente y tambe mentor cu no a haci nan trabao como debe ser, y no a entrega cifranan escolar na tempo.
Esaki ta algo cu ta desanima e studiantenan hopi mes! Esey ta reaccion cu DIARIO a ricibi di mayornan cu no por compronde con den e epoca moderno aki, cu Colegio EPI no por ni usa un network corecto pa asina tabula tur cifra na un forma central.
“Esey nifica, cu mi yiu a bin di scol ayera y e no sa si el a bay over, of kico otro,” un alumno a indica na DIARIO.
El a haya sa cu tin hopi alumno mas disgusta cu e sistema aki, y cu ta pone manera un nubia scur keda colga un biaha mas riba Colegio EPI.
Mayornan a hasta expresa, cu nan ta disgusta cu durante henter e schooljaar di 2021-2022 tabatin situacion cu docentenan no ta entrega cifra, tin sector cu ainda ta den ‘her’. Alumnonan ta mira cu tin biaha mentor no ta ni presenta na scol mes. Hasta tin docente cu ta perde tur papelnan coregi di Toets.
Loke ta un gran decepcion pa algun mayor, ta cu semper Colegio EPI ta exigi, spera, y pusha tur studiante pa nan haci lo mihor durante e aña escolar, pero na final nan mes ta bin laga e alumnonan na caya.
Ata nan awor, sin rapport y sin diploma. E speranza tey cu Inspectie di Enseñanza check ta kico ta pasando y busca un solucion rapido.
