PR di DIMP Meverly Romano:
*Pero falta ainda 22.486 pa paga e di dos mitad
*Corda cu 30 di Juni ta e deadline!
ORANJESTAD (AAN) – Meverly Romano, Relacionista Publico di Departamento di Impuesto (DIMP), den entrevista cu Matutino DIARIO, a expresa cu nos a yega na mitad di aña y un djis aki tin e otro fecha final pa loke ta trata impuesto di vehiculo di motor. Dialuna 30 di juni ta e 'deadline' y diamars 1 di juli ya caba DIMP lo coba 50% di boet, riba esnan cu no a cumpli.
“Dia 30 di juni awo, esnan cu no a paga e impuesto di e di dos mitad di aña lo mester haci e pago di esaki riba e fecha aki. Nos tin un grupo grandi cu a cumpli caba. Nos tin aworaki 63% cu a paga caba e aña completo, y nos tin 24% cu a paga e prome mitad di aña. Dus, e 24% aki ta e numbernan di auto cu falta pa paga e di dos mitad di aña 2025. Y esaki ta representa un cantidad di 22.486 number”, señora Romano a señala.
El a bisa cu e automobilistanan DIMP no por bisa cu nan no a cumpli, pasobra e fecha no a yega ainda, pues nan tin e chens, e espacio pa haci esey, pero si ta un cantidad basta grandi.
“Dus, aworaki e cumplimento ta 87%, nos ta hopi satisfecho cu esey; semper cu ta 80% of mas nos ta mira cu esey ta bay den bon direccion, pero den cantidad falta ainda di paga e di dos mitad di aña y esey ta 22.486. E cifra aki ta duna nos tambe cu ta bay bira druk den e dianan nos dilanti. Kiermen, y nos ta wak tambe poco, poco den nos salanan, cu mas y mas contribuyente ta acudi pa haci nan pago di impuesto di vehiculo di motor, pasobra e deadline ta yegando y manera semper, e fecha final ta dia 30 di juni awo y pa su mañan, dia 1 di juli, esnan cu no a paga lo ricibi e boet di 50% riba nan nomber”, Meverly Romano a señala.
El a reitera cu e boet di 50% ta un gasto cu no tin mester, pero tur ley di belasting tin su sancionnan na unda cu Departamento di Impuesto tin cu ehecuta e leynan aki. “Un recomendacion pa bay na tur contribuyente automobilista, pa tene cuenta cu 30 di juni ta ultimo dia pa paga e di dos mitad di impuesto di e automobilistanan cu a paga e prome mitad, y e grupo aki ta esun cu nos ta invita nan pa haci e pago na tempo, y no warda pa e dia 30 pasobra e por bira mas druk, y esnan cu ta paga via banco nos kier pidi nan pa percura pa e placa pasa riba nos cuenta di banco pa dia 30 di Juni. Kiermen, no haci e pago dia 30 anochi pasobra e placa ta bay pasa riba nos cuenta dia 1 di juli” señora Romano a remarca.
