Aruba a duna bon bini na crusero Disney Dream

ORANJESTAD (AAN): Tabata Diamars cu e barco crusero Disney Dream a haci su prome bishita oficial na Aruba.  El a keda na Aruba for di 9:00 am te cu 11;00 pm.

   Aruba Ports Authority tabata contento cu e prome bishita aki, y durante un ceremonia abordo di e barco, a haci entrega di un plaquette na e Capitan pa asina recorda e prome bishita aki, e.o. di Aruba Tourism Authority.

   Capitan Preston y su tripulacion tabata hopi hospitalario cu bishita di e funcionarionan di Aruba.  Hasta Mickey Mouse dado momento a pasa dal un bishita pa saca potret.  A compronde cu e pasaheronan a gosa un mundo di e bishita extenso na Aruba.

   E barco Disney Dream ta pertenece na Disney Cruise Line, cu ta forma parti di The Walt Disney Company.  El a wordo construi na Alemania, y a cuminsa opera na aña 2011.  E cantidad di pasahero cu e ta transporta ta promedio di 2.500, aunke e por bay te maximo 4.000 pasahero.

   E barco tabata riba un viahe di 7 dia den Southern Caribbean, cu a sali Diabierna 10 di November for di San Juan, Puerto Rico.  El a bishita isla di St. Kitts, Antigua, Aruba, y Curaçao, prome cu el a regresa San Juan riba Diabierna 17 di November.