Fin di siman pa yega Dia di Mucha ta exigi refleccion serio
*Mucha sin proteccion di un hogar y su dolor di alma ignora
*2024 mester ta porta pa fin di abuso contra integridad di mucha
ORANJESTAD (AAN) — Si mundo a conoce crueldad, ta durante e epoca moderno cu a haci mucha bira victima di e egoismo, e falta di sentimento humano di hende enfrente mucha.
Como medio di comunicacion, e celebracion di Dia di Mucha cu ta habri e siman nobo dilanti porta, ta exigi exposicion di e forma cu mucha ta wordo uza na tur forma dor di adultonan, cu no ta tene consideracion cu loke ta realmente felicidad di mucha.
Pa bay na un extremo mester bay Corte, caminda continuamente sentencianan ta dicidi pa muchanan, cu no a pidi ningun hende pa nan bini na mundo, te pa nan bira mercancia of hasta juguete den weganan di poder di adultonan.
No tin palabra pa expresa e berdad di tanto mucha na mundo, caminda na un forma criminal cada minuut mucha ta muri na e formanan mas cruel y den gueranan cu ta kita tur derecho humano for di mucha.
Rumbo pa 2024 mester bini coreccion den e formanan cu adultonan, na e paisnan mas primitivo te e paisnan mas avansa riba tur tereno, ta destrui bida di mucha na tanto forma a base di egoismo, abuso y loke ni sikiera animal mes lo a haci cu su cria.
Awe si kier realmente papia di derecho di e mucha, mester inventarisa kico ta yama derecho di un mucha.
Ki derecho un mucha tin hasta pa e nace?
Na momento cu un pushi of cacho ta den problema, alarma grandi ta wordo bati. Si un vehiculo mester alcansa un cacho riba caretera y core bay sin asisti e animal, problema ta start.
Na mes momento, muchanan ta wordo herida te den nan alma na tanto cas cu nan mester yama cas, pero hamas nan por sinti nan mes na cas.
Muchanan, cu hopi bez ta producto cu personanan cu a produci nan como yiu, no kier acepta como nan responsabilidad.
Si nan a wordo permiti pa mira luz di bida, e pais mester mira con ta pone placa riba mesa pa nan come, pasobra demasiado mayor ta produci mucha pero no ta acepta nan responsabilidad pa nan acto.
Muchanan cu ta nace sin derecho di yama nan mes yiu of hasta ser humano, si mira e dolor cu tanto mucha ta confronta ora nan wordo abusa fisicamente dor di cobardenan cu ta yama nan mes mayor.
Muchanan cu no conoce nan raiz. Muchanan sin mama, sin tata, sin nomber propio for di nan nacemento.
Muchanan cu hamber na un pais caminda hamburger cu a resta di paki di cuminda cu a cumpra na snack, ta wordo depone den baki di sushi.
Mamanan ta entrega mucha cu mester ta den nan braza na otro persona cu mester bira mama di yiu cu nunca a pidi pa nan nace.
Noticia di 2023 tabata continuamente abuso y mas abuso hasta sexual di muchanan cu mester sigui hari, aunke nan alma ta kibra.
Gueranan cruel ta haci mucha e prome victimanan den cobardia, cu mas y mas ta bira marca di hende moderno, cu a cambia mundo den un teatro di mal gusto.
Dia di Mucha 2023 mester wordo uza como Dia di Simbolo di hende, cu a perde y cu a entrega tur su balor.
Ki balor hende y sigur e pober mucha cu no por defende su mes tin ainda?
Dia di Mucha 2023 ta pone nos den antesala di un mundo di cambio. Un mundo cu ta pasa den e dolor di parto di un comunidad mundial nobo a base di balor di hende y no balor di loke a wordo inventa pa hende destrui hende, cu ta e logro mas grandi di hende durante un 2023, cu mester tabata recuperacion total di Covid-19 pero a bira matansa total di hende den crueldadnan cu ta haci cu hasta bestia ta sconde!
Dia di Mucha 2023 mester bira e prome di un ciclo di reunion, debate, accion pa na 2024 recupera e balor di hende, e balor di mucha, e balor cu hende ta destrui pa asina den e bobedad extrema, destrui su mes y su felicidad.
Awe honestidad ta exigi pa lanta para contra e forma cu a destrui e derecho fundamental di muchanan pa ta mucha, cu a base di nan experencianan diario, ta crea un pakete di moral, di felicidad real cu constitucionalmente ta nan derecho.
Na 2023 mundo ta yora e dolor di muchanan, den matanza di e ser humano. Den e matanza di e base di e ser humano. Den matanza di dignidad humano, cu mester wordo recupera na 2024 sigur pa e mucha inocente cu ta sufri den guera of boca cera den loke e mester yama cas!
