Aruba Lions Club ta uni forza cu Xavier University organisando un dia pa control di sanger

ORANJESTAD (AAN): Aruba Lions Club cu pa mas cu 75 aña ta sirbi nos comunidad cu diferente proyectonan,

un biaha mas hunto cu e universidad di medicina na Aruba cu ta Xavier University, ta organisando un dia pa control di sanger.

Manera ta custumber e dos organisacion aki pa algun tempo caba trahando hunto riba proyectonan di salubridad, y riba diasabra 18 di November, cuminsando pa 9'or di mainta te cu 1'or di merdia, ta warda pueblo en general, adulto y tambe muchanan ta bonbini na Xavier University na Sta Helenastraat 23, unda por hasi control di sucu, colesterol, presion, tambe tin evaluacion di nutricion, y lo por ricibi conseho riba un di e topiconan aki. Esaki lo ta completamente gratis y informacionnan tambe lo wordo duna riba diferente otro temanan di salud.

Aruba Lions Club hunto cu Xavier University cu nan miembronan boluntario, ta warda un y tur pa atende na e actividad aki pa bo propio salud  caminda cu ta ofrece e informacion y concientisacion pa un bida mas saludabel.