Aruba a corona Gran Dama Folklore 2025

ORANJESTAD (AAN): Diasabra cu a pasa, Centro di Bario Brazil a bira podium di un celebracion cultural bunita y elegante durante e eleccion di e Gran Dama Folklore 2025.

Un anochi yen di presentacionnan colorido unda beyesanan Arubiano a demostra nan arte, elegancia y pasion pa baile y tradicion folklorico.

   Despues di un show inolvidabel di talento, e titulo maximo di Gran Dama Folklore a wordo otorga na señora Geraldine Racherds-Albertsz. E publico a goza di un anochi di tradicion y orguyo Arubiano. Pabien na tur participante pa mantene folklore bibo y un pabien special na e ganadora cu e titulo di Gran Dama Folklore 2025.