Aruba a bira Host di e curso “E fundamentonan di Gimnasia” den cual cinco otro pais a participa

Milly Bagheri, Presidente FGA:

ORANJESTAD (AAN) -- Federacion Gimnastico Arubano a yama un conferencia di prensa, Diabierna siman pas, den cual Milly Bagheri, Presidente di FGA (Federacion Gymnastico Arubano), a hiba palabra. El a splica cu e dia aki tabata tin e culminacion di un siman largo di un curso hopi intensivo, pa e coachnan di e region.

Milly a señala cu no solamente tabata tin coachnan di Aruba, di e tres clubnan di gimnasia local, pero tambe a bin di Costa Rica, Uruguay, Brasil, Colombia, y Curacao. E curso cu nan a tuma ta titula “E fundamentonan di Gimnasia”. E ta un curso hopi importante, Milly a subraya, pasobra e ta trece e base di gymnastic pa e coachnan. Di eynan nan por crece y sigui amplia nan conocemento cu otro nivelnan di Gimnasia.

“Akinan nos tin Gimnasia artistico, ritmico, y gimnasia pa tur edad. Dus, akinan nos tin representacion di coachnan cu ta haci tur e tiponan di Gimnasia ey. Pues e ta un curso en general cu tur por participa y bay bek na nan club, y implementa e  conocimento ey pa nan mehora nan tecnicanan den nan club”, Milly Bagheri a expresa.

Seguidamente, Junior Rivero a bisa cu na Aruba na e momentonan aki tin tres club cu ta Club Avance, Club Perla y G.A Gymnastics. Hunto cu nan tin diferente seccion di e parti artistico y e parti ritmico. El a reitera cu e curso, riba su mes, ta inmensamente importante, pa e Federacion Gymnastico di Aruba, esaki ta un logro grandi, pa motibo cu a logra haya e curso aki na cas, ya cu Aruba ta e host pa esaki, pa prome biaha den historia. “Esaki ta yuda pa e desaroyo di e coachnan y, naturalmente, na final di dia e desaroyo di e atletanan mes tambe. Pa nos, mas claro, nos ta yega na un nivel mas halto den deporte, y esey ta na final di dia loke nos kier logra tambe”.