ORANJESTAD (AAN): E Ola Tropical pisa cu a pasa tanto Diahuebs como Diabierna, a regala comunidad un show di lamper cu strena den oranan di anochi.
Varios persona mesora a ranca plug di coriente for di muraya, pa nan TV, nan frigidaire, nan computer, nan tablets y smartphone, djis como precaucion.
Diahuebs anochi, e maltempo pisa cu tabata pasa den area Noordwest di Aruba a trece lamper cu a dal den e grid di coriente di NV Elmar.
Esaki a pone cu varios area, incluyendo Moko, Calbas, Kudawecha, Catiri, Tanki Leendert, Tanki Flip, Hato, Pos Abao, y Bubali a keda den scuridad e anochi trempan aki. Pa colmo tabata calor combina cu humedad halto.
Ora cu e yobida y lampernan a bira poco menos, e tecniconan di NV Elmar a subi caya pa asina check unda tin fuse cu lo por a bula. Asina a logra isola cierto zona for di e grid afecta, y ya pa 9:19 pm nan por a duna coriente bek na area di Tanki Flip.
Nan a realisa tambe cu e sistema di voltahe halto riba e area di Moko, Tanki Leendert, y Pos Abao a wordo afecta. Diferente tecnico a cuminza traha simultaneamente pa traha lista di material cu nan tin di busca na deposito, y traha un plan pa haci e trabao di drechamento di tur componente cu a wordo destrui door di lamper.
Pa 11:05 pm, cu nan a keda cla cu parti di reparacion, ya caba a duna resto di Tanki Flip bek coriente. Cinco minuut despues, pues pa 11:10 pm, nan a duna coriente bek na area di Bubali y vecindario.
Finalmente pa 11:57 pm, tur resto di area di Moko, Tanki Leendert, etc. a haya coriente bek. Un anochi di hopi trabao pa NV Elmar.
Ya pa Diasabra atardi, e Ola Tropical a keda bay mas pabao cu velocidad di 24 km/h, y ta alegando. Pero ainda e atmosfera aki banda a keda basta instabil.
