Artista Plastico Jo-ann Kock-Ridderstap ta anuncia su exposicion di Casnan di Cunucu na MANA

*Lo presenta pinturanan di nuebe hoben tambe

ORANJESTAD (AAN) – E artista Plastico Jo-ann Kock- Ridderstap, a elabora den entrevista cu DIARIO, a menciona cu e tin mas of menos tres luna di un proyecto cu ta tumando lugar na Museo Arkeologico.

Aworaki e ta bay presenta un exposicion di “Casnan di Cunucu” na Museo Arkeologico tambe, cu ta bay tuma lugar dia 7 di Juni, anochi di 7 pa 9’or, na cual e ta invita pueblo di Aruba pa bin observa.

Un total di nuebe hoben ta bay presenta nan obranan di arte, cu tin di haber cu casnan di Aruba. Cada un tin nan cas cu  por ta di nan wela, tatarawela, etc.

El a indica cu Stichting Monumenten Bureau tambe a yuda nan cu nan por a haya informacion di cierto casnan cu ta proteha door di e fundacion.

Jo-ann Kock-Ridderstap a expresa cu e proyecto tabata hopi fructifero, y den e tres lunanan aki nan a haya opleiding di MANA mes, tocante casnan di antes, con Aruba tabata den pasado, nan a siña con e casnan antiguo tabata paden, e colornan, pinta den Acrylic, entre otro. Aworaki tin dos hoben, cu nan mayornan a informa Jo-Ann cu nan ta bay scoge arte como vak na scol, pasobra actualmente, scolnan ta dunando opcion pa nan scoge arte como vak.

E hobennan a bay dilanti, nan a siña hopi di no solamente arte pero di aruba su cultura, di e herencianan cu nos antepasadonan a laga pa nos, Kock-Ridderstap a señala.