20 di Mei ta Dia Mundial di e Abehanan:
ORANJESTAD (AAN) Awe 20 di Mei ta un dia di observacion mundial hopi interesante. Ta Dia Mundial di Abeha, na honor di Anton Jansa, pionero di e ofishi y arte conoci como Apicultura moderno. E tabata originario di Slovenia. E fecha aki a wordo estableci pa e Organizacion di Nacionnan Uni (ONU).
Abehanan ta e “polinizador” mas importante di e planeta, y e consumo di honey ta un di e beneficionan di mas grandi cu e humanidad tin.
E abehanan ta sostene gran parti di loke ta wordo consumi na mundo y nan ta preserva eco-sistemanan cu henter cu nan trabao silencioso. Si nan no ta wordo molestia, nan ta pasa sin ser nota, pero nan tarea ta sostene bon parti di e bida na tera. E abehanan cu nan incansable buelo di flor pa flor, ta permiti cu miles di cultivo duna fruto. Kico lo sosode si nan wordo elimina for di e planeta?
Sin nan, hopi alimento basico lo disparce; e biodiversidad lo colapsa, y e sistemanan agricola lo enfrenta un crisis sin precedente.
Pa hopi motibo, e fecha aki ta sirbi pa reflexiona riba e importancia di e abehanan, nan fragilidad, y e peligronan cu nan ta enfrenta pa motibo di e actividad humano. Mas aleu di nan honey nan rol den e ekilibrio ambiental t’asina profundo como tambe e subestima di nan balor fundamental.
Miyones di alimento ta depende di e labor polinizador di e abehanan, y cada flor cu nan bishita ta marca e comienzo di un cadena cu por culmina den e sustento di comunidadnan henter.
E abehanan no solamente ta fabrica honey, sino cu tambe ta responsabel di fecunda ciento di especie vegetal. Nan buelo constante entre flornan ta permiti e reproduccion di fruto, semia y berdura, locual ta asegura un dieta diverso y rico pa miyones di hende. Estudionan internacional ta coincidi cu alomenos un tercer parti di e alimentonan cu nos ta consumi cada dia ta existi danki na e accion di e abehanan. (Fuente consulta: Infobae).
