Detecta siman pasa...
- E biaha aki tin mas yerba cu nunca
ORANJESTAD (AAN): E dolor di cabez di e yerba di lama conoci como ‘Sargassum’ ta plamando un biaha mas den Lama Caribe. E biaha aki tin manchanan grandi di esaki ta acercando Florida tambe.
E potretnan aki saca siman pasa for di avion bulando como 40 km panort di Aruba, por mira manchanan constante di Sargassum moviendo segun coriente di lama.
Prensa Mericano ya caba a adverti, cu ta parce cu Sargassum ta mas grandi cu nunca e biaha aki. E manchanan di alga aki a kibra nan mesun record di tamaño, y apenas e temporada di crecimento di nan a caba di cuminza.
Sargassum e momento aki ta rek y cubri como 9.000 kilometer di Oceano Atlantico y Lama Caribe. E crecimento di e yerba di lama pa e aña aki ta menaza di trece dolor di cabez pa varios pais. Esey ta di compronde, como cu Sargassum ta afecta varios area di beach unda paisnan ta depende riba dje danki na turismo. Na Florida a confirma cu Sargassum awor ta plamando den canalnan di awa paden di Florida, y ta aglomera na varios marina, y tambe beachnan na Miami.
Riba Lama bruto varios mancha diki di Sargassum ta wordo “kibra na pida-pida”, pero toch ora nan topa na un beach of costa, nan tur ta aglomera bek.
E dos potretnan aki ta saca siman pasa na como 40 km panort di Aruba. Bo por mira e aglomeracion hopi “largo” di Sargassum. Nan ta leu for di otro, pero ora di yega na costa, nan lo bay aglomera excesivamente y pak riba otro den un biomass excesivo.
Desde 2011 a bin ta notando e aglomeracion abundante di e yerba aki den Caribe, Golfo di Mexico, y tambe region di zuid Florida. Algun hende a purba di haci uso di nan na e.o. Mexico, pa construi cas cu nan. Otronan ta den experimento pa haci algo util cu nan.
Pero na varios area di resort cu ta wordo ataca pa e Sargassum aki, e trabao duro ta pa kita tur esaki for di beach pa asina reduci e holor, e blokeo, y bista desagradabel den wowo di turistanan. Esey ta debi cu unavez Sargassum spula riba beach, e ta cuminza putri y ta saca gasnan masha stinki mes, y esaki por ta algo cu ta laga turistanan keda disgusta y ta haya gana di subi avion y bay bek nan cas mesora.
Temperatura di lama cu ta sigui subi, ta loke a pone Sargassum bin cada biaha cu mas surplus. Y tur pais den Caribe mester ta prepara pa si acaso diripiente un ‘blob’ gigantesco di e yerba aki bin spula na beach.
