Artista Maze de Boer a keda impresiona cu asina hopi oficina di Lotto na Aruba

Obra di Lotto y tambe obra di Bingo...

ORANJESTAD (AAN): Na Ateliers ’89 den Dominicanessenstraat a tuma lugar e apertura di e expo di e workshop di 3D, yama Re-Move.  Tur esaki bao guia di e artista maestro Hulandes, Maze de Boer.

   Cu e titulo “Cambiando Bida”, e participantenan di e workshop a haya nan ta traha cu e concepto di kita e parti patras di e objeto cu bo a diseña y haci un obra nobo di esaki. Un aspecto diferente cerca e participante nan di e workshop aki cu mester a crea obranan nobo for di e concepto aki. Dunando nan un caminda di experimenta na un forma inespera. Kico ta e parti patras di bo idea kico e tin y con bo ta visualisa esaki.

   Maze de Boer a wordo inspira na Aruba mirando tur e rebendedornan di Lotto rond di e isla, y el a pensa cu esey ta algo unico di Aruba, y cu bo no ta mira otro parti di mundo.

   Pues por a mira como 3 obra eynan cu tin di haber cu loteria, y tambe uno cu tin di haber cu un fantasia rond di e oficinanan di Lotto cu tin rond di Aruba.  Tambe uno cu un man ta sali for di un baki yen di bolita di number.  Tambe a mira un fantasia rond di e gusto enorme na Aruba tambe pa hunga wega di Bingo.

  Bo por mira e expo aki pa 1 luna largo, y ta habri tur atardi di 2:00 pm te cu 6:00 pm.