ORANJESTAD (AAN): E turista Stephen Paul Walker, conoci como Steve, tabata gusta bishita Aruba hunto cu su casa Bebe.
Nan ta conoci aki como ‘Steve and Bebe’. Gusta bishita Aruba durante invierno pa goza di lama y tambe hunga su weganan di golf.
Siman pasa, Steve a fayece cu edad di 76 aña. Ultimo añanan e tabata batayando demencia, y a fayece na su pueblo di Island Falls, cu ta keda poco panort di Bangor, na estado di Maine na Merca.
E tabata activo den US Navy, y despues a bay traha pa UPS. Despues di a retira for di e compania UPS na 2001, el a cuminza explora su viahenan pa Caribe hunto cu su casa Bebe. Asina nan a bin conoce Aruba, y a dicidi na bishita e isla regularmente. Ademas di Aruba, den invierno e tabata bishita Bahamas y tambe Florida.
El a bay laga su casa Bebe cu kende e ta casa pa 54 aña, tambe dos yiu homber, y un yiu muher atras, y diferente nieto. Un memorial service na su graf cu Honor Militar lo bay tuma lugar dia 24 di Juni 2023 na St. Agnes Cemetery na Island Falls.
