Artista Enrita Werleman cu workshop di mosaico cu tecnica Picassiette

Otro luna na Aruba...

ORANJESTAD (AAN): Ateliers '89 Punto Di Beyas Arte Aruba den cooperacion cu taller di mosaico yama Artemosa na Santa Cruz lo bay tene un workshop nobo y interesante di mosaico cu e tecnica di Picassiette. Esaki lo ta bao guia di Directora di Artemosa e artista di mosaico señora Enrita Werleman.

   E workshop lo ta for di Dialuna 2 Maart te cu Diahuebs 26 di Maart. Workshopnan ta Dialuna, Diamars y Diahuebs di 6:30 pa 9:30 pm

   Patrocina pa Cultuur Fonds Caribe, cu sumo placer Ateliers '89 ta trece e workshop aki di mosaico cu e tecnica di Picassiette den cooperacion cu Artemosa. E workshop lo inclui tur material. Importante ta cu e workshop aki mirando tempo y material lo ta solamente pa 10 persona so. Na cual ta spera cu tur hende cu kier participa lo inscribi nan mes mas pronto posible pa sigura nan participacion. Pa sigura bo participacion bo mester yama na cel; 565-4613 o email na This email address is being protected from spambots. You need JavaScript enabled to view it.. Unabes bo haci esaki lo sigura bo participacion asina cu bo haci e pago di e costo di e workshop.

   Manera esaki ta concretiza lo informa atraves di email tur otro requisito cu bo tin mester pa asina e prome dia di e workshop bo por cuminsa traha dircetamente riba bo obra di mosaico. E workshop aki lo termina den un exposicion di tur e obranan traha durante e workshop. E presentacion lo ta den exhibicion pa un luna den e salanan mayor na Ateliers '89. Día y ora lo wordo anuncia despues. Naturalmente nos ta spera cu bo mes lo colecta mas tanto cu ta posible. Bo mes un tayonan, copi, scoter, etc. Cu colornan fuerte y colorido. Flor, deseño straño o otro. Esaki  di bo mes un colecion o di hendenan cu bo sa. Tambe si tin hende cu kier haci donacion di nan ceramica pa e workshop aki na Ateliers '89, por yama tambe e ora.

   Mosaic Picassiette ta e arte di traha cu material recycla cu ta mas tanto tayo, copi y scoter. Un technica cu a cuminsa na Francia unda Raymond Isidore tabata colecta material kibra y a decora tur su cas y cura cu pida pida tayo kibra y forma asina un bunita obra di arte cu ta yama La Maison Picassiette na Chartres, Francia. Awendia tin diferente artista rond di mundo cu ta crea obranan di arte di Mosiac Picassiette. Na 2025 Enrita a presenta algun workshop Internacional y local cu e technica aki creando, animalnan y flornan di Mosaic Picassiette.  Si bo kibra un tayo, no bente afo, warde bo traha un bunita obra di arte.

   Enrita Werleman, un autodidacto Arubiano, a cuminsa traha arte di mosaic como 15 aña pasa. Creando su mes arte di mosaic a cuminsa educa tambe otronan con pa traha cu materialnan y hermentnan. Den transcurso di tempo Enrita a sigui desaroya su tecnicanan cu diferente material, manera mosaic, glas, piedranan, marmer y ceramica. Tambe el a tuma cursonan online y a gradua como maestra di  Arte di Mosaic. Den un curso di dos aña cu un Profesora di Chile el a amplia su conocemento ariba tur terreno di arte di mosaic, di mosaico Antiguo te cu arte di mosaico contemporaneo. A siña traha cu tur sorto di material, herment, pego, andamento etc. Ta durante e cursonan aki cu el a crece tambe den e arte di Mosaic Picasiette, a tuma cursonan na Alemania y Chili y a duna varios cursonan aki na Aruba.