Segun Parlamentario Rocco Tjon:
ORANJESTAD (AAN): Segun Parlamentario Rocco Tjon, tin consehonan huridico cu ta indica cu e base legal ta existi pa a cumpra ‘Body-worn Cams’ (BWC).
Door cu e ley ta regla, Gobierno anterior a pasa door di un proceso extenso pa cumpra nan, cu participacion di entre otro sindicato di Polis, y di profesionalnan di Cuerpo Policial. E intencion di e body cams, e parlamentario a enfatisa, ta pa eleva siguridad di polis y di ciudadanonan y tambe pa haya e imagennan mesora den caso di incidentenan pa conclui realmente kico a sosode.
El a enfatisa tambe cu aunke e body cams por influencia e comportacion di un ciudadano na momento cu e sa cu un polis tin un body cam y ta filmando, esaki no lo bay evita pa criminalidad of otro casonan lamentable tuma luga, manera tabata e caso di siman pasa unda un ciudadano a perde su bida.
Den tur caso, el a enfatisa cu e body cams a wordo cumpra y den un reunion recien den Parlamento, Alto Comisario a informa cu e proyecto piloto a cuminsa den diferente district mientras ta reglando procesonan interno, cu ta encera con e agente policial ta traha cu e body cam, y unda e ta entrega esaki ora e yega warda bek, cuanto tempo ta warda e informacionnan, entre otro.
