Rino Hermans, director CMO:
ORANJESTAD (AAN) Hefe di Crisis Management Office (CMO), señor Rino Hermans, den entrevista cu DIARIO, a señala cu CMO ta monitorea cambio climatico desde aña 2013, y na 2024 nan a wordo certifica den monitorea, analiza y calcula e impacto.
“Antes e hendenan no tabata kere den un cambio climatologico, y awe nos ta cuminza wak e efectonan cu ta dunando un impresion anormal, cu probablemente bo ta bay conoce un Aruba cu den marduga ta haya un temperatura di 22 cu 23, cu ta e temperatura di un airco”, Rino Hermans a indica.
El a agrega cu, na cierto momento, nos mester cuminza prepara cu e mundo ta instabil, y p’esey semper CMO ta bisa pa busca bo propio seguridad, pa bo famia y bo cas. CMO no ta un ‘zorgpas’. “Kiermen cada ken mester proteha nan mes. Loke nos ta haciendo aworaki, ta halando tur e datanan aden pa wak ora cu nos tabata tin un winter pisa, ki efecto e tabata tin riba e periodo di horcan. E tabata activo? Con agresivo nan ta? Apesar cu e ultimo siete añanan e ta duna bo indicacion si, cu categoria uno, practicamente nos no ta papia di dje mas; cu tur ta birando categoria 2,3,4,5 ya 2017 hasta el a pasa e escala di 5 cu nan a bisa. Nos tin cu cuminza papia di categoria 6 cu 7 awo, den horcan”, Rino Hermans a señala.
El a agrega cu CMO ta esun cu ta prepara pueblo, material, y nan capacidad.
“Miho nos ta prepara y nunca haci uso di dje, cu haci uso di dje sin cu nos ta prepara. 2026 ta riba e maneho di CMO cu nos ta bay dedica mas na voorlichting (educacion) cu opleidingnan, pa fortifica e bistanan di nan conocemento, pa pueblo cuminza prepara su mes. Si nos tuma ehemplo geopolitico di Ukraine cu Rusia, Hulanda a pone un flyer na porta di cas di tur hende, con pa prepara en caso di un indicacion. Aruba ta conoci cu semper tabata manda buki di horcan na casnan y mi ta kere cu a yega momento atrobe, pa nos moderniz’e y manda pa cada hogar atrobe pa nan tin sikiera e informacion basico, pa nan propio seguridad”, señor Rino Hermans, director di CMO, a remarca.
