Segun Diego de Cuba di STA:
ORANJESTAD (AAN): Serlimar ta un compania cu derecho di existencia y merece mas atencion di parti di Gobierno di Aruba, considerando su importancia pa nos pais. Asina Presidente di Sindicato STA, señor Diego de Cuba a expresa durante un entrevista recien cu DIARIO.
El a menciona cu STA ta compilando un carta pa asina mas pronto posibel haya oportunidad pa sinta cu Minister Dowers pa trata e problematica di Serlimar. Ya ta pa hopi aña e compania aki tin problema. Segun e, ya prome cu Serlimar a drenta e fase di surseance van betalling, ya a ripara cu e situacion lo empeora.
Tabatin decisionnan descabeya cu a tuma luga den pasado cu a hiba Serlimar den un situacion bastante penoso. Incluso, el a menciona, cu durante temporada di un campaña electoral, a pusha mas di 400 trahado den Serlimar pa entre otro haci limpiesa canto di caminda. “Esaki a manca e presupuesto di Serlimar y nos sa cu tabata decisionnan tuma politicamente y esakinan a perhudica e compania barbaramente”, el a enfatisa.
El a remarca cu Gobierno mester tuma decision entre otro si e ploegnan aki cu ta traha canto di caminda lo bay resorta bou di Serlimar of lo separa nan completamente y laga nan resorta bou di DOW.
“Actualmente, Serlimar tin 161 trahador, mayoria yiu di tera. Y e situacion mester cambia. Den mi opinion, e miho direccion lo ta pa haci Serlimar un NV di Gobierno manera varios otro compania a haci den pasado entre otro Elmar, Setar, Aeropuerto y APA. Nan ta dunando bon resultado”, el a remarca.
El a menciona cu, segun e, e unico dos NVnan cu ainda ta wankel ta Arubus y Post. Pero cu boluntad y cambionan structural, nan por bira companianan cu por genera mas placa. “E companianan aki merece mas atencion di parti di Gobierno pa soluciona e problema y structura pa asina no encontra cu problema tur aña y haya accionnan constante”, señor de Cuba a expresa.
Segun e, tin hopi salida y structura pa reorganiza Serlimar y hacie miho di locual e ta pa genera mas entrada y tambe pa mehora salarionan di e trahadonan y e beneficionan pa asina nan tambe por produci miho.
