Apertura di scol di musica 'Porta pa Harmonia'

Dedica na Ramona Visser

ORANJESTAD (AAN): Den fin di siman tabatin e apertura di scol di musica, Porta pa Harmonia den districto di Noord. Un idea cu a nace durante un accion di bario den Semeleerstraat, na momento cu Prome Minister mr. Mike Eman a mira un cas bashi y a surgi un idea pa dun’e cas aki un proposito. E cas aki tawata di señora Ramona Visser, un señora balente cu a lucha cu 9 yiu y a sa di surpasa tur reto y contratiempo.

Pa inicia e proyecto aki Prome Minister mr. Mike Eman a tuma contacto cu e yiunan di señora Visser pa asina comparti e idea di crea un scol di musica pa mucha den e cas cu pa hopi aña nan a biba aden.

Nan a haya esaki un bunita idea y a comparti e idea aki cu nan mama cu a bira hopi contento cu e proposito cu lo a bay duna e cas. Señora Visser ta stima mucha y pa es motibo tambe a pone su nomber hunto cu e nomber di e scol, Porta pa Harmonia dedica na señora Ramona Visser.

Arubaanse Muziekschool (AMS) a brasa e idea aki y Fundacion Cas pa Comunidad Arubano (FCCA) a duna tur cooperacion pa renoba e cas y ta dispuesto pa mira unda lo por coopera den mas bario pa tuma iniciativa similar. Un proyecto cu hopi sentimento, unda cu Prome Minister mr. Mike Eman conhuntamente cu AMS kier ofrece comunidad un luz di speransa adicional unda tur hoben cu ta desea di desaroya un talento cu nan por tin den cualkier instrumento musical por bin aki y sigui e lesnan.

Prome Minister Eman a expresa su palabranan di gratitud y ta cla pa continua cu mas di e trabounan importante aki pa comunidad. Pronto lo bira mas inciativa similar den otro bario rond di nos isla.