Jurette Croes, Relacionista Publico DVG:
ORANJESTAD (AAN) Den entrevista cu Matutino DIARIO, e Relacionista Publico di Departamento di Salubridad, señora Jurette Croes, a indica cu e vacuna di Influenza ta algo di tur aña.
“T’asina cu den e temporada di November-December nos sa cu den e region aki, diferente virus cu ta circula ta duna bo sintomanan respiratorio y un di nan ta Influenza, y pesey tur aña nos ta ripiti e campañanan di concientizacion y di vacunacion contra influenza pa e grupo di riesgo”, Jurette Croes a splica.
E grupo di riesgo ta personanan di 60 aña y mas, y pashentnan di malesanan cronico of di e sistema respiratorio, of esnan cu a pasa den cancer, chemotherapy; personanan cu nan sistema Immune ta debilita. Nan ta wordo aconseha pa tuma e vacuna pa proteha nan mes contra influenza.
“Influenza no ta un simple griep. Loke pa un persona por ta un simple griep pa mi no ta, debi na su sistema immune”, Jurette Croes, PR di DVG a reitera.
El a agrega cu den e temporada aki ta conoci y nos ta tende cu hopi hende ta haya griep pero tin diferente virus cu ta ocasiona e sintomanan di griep.
“Dus, e ora ey bo tin influenza A, B,y diferente otro virus cu ta duna bo e mesun sintomanan y e vacuna aki, cu nos ta ofreciendo nos comunidad ta contra influenza y pa e grupo di riesgo. Bo tin covid-19 tambe cu ta duna e mesun sintomanan”, Jurette a reafirma.
Dialuna 3 di November DVG, su seccion di Malesanan Infeccioso, a cuminza duna e vacuna contra influenza. Personanan di 60 aña y mas ta hay’e completamente gratis. Mester presenta bo carchi di AZV (of AZV App). “Si bo no tin 60 aña pero bo ta un persona na riesgo, bo tin un complicacion of un malesa cronico, si bo sistema Immune ta debilita, bo ta pidi bo docter di cas un recet, bo ta bin cu ne y bo ta haya e vacuna gratis”, Croes a menciona.
E horario ta di Dialuna pa Diabierna atardi for di 1.30’or te cu 4’or. No mester haci afspraak, pero cana drenta.
