Segun analisis di Jayburtt Dijkhof, PhD:
ORANJESTAD (AAN) Señor Jayburtt Dijkhoff, den continuando cu su ponencia dirigi na opinion publico, a comenta cu na Hospital Dr. Horacio Oduber tin lista di spera unda tin pashent tin cu warda seis luna, prome cu haya cita, y esey ta causando un frustracion inmenso den pueblo.
“Hopi hende ta bisa enberdad cu ora bo yega na bo beurt e momento a yega caba pa ‘bay cielo’ of bao bo propio gasto bo tin cu bay den exterior, hopi biaha na Colombia pa bay busca bo salud, pasobra ora cu bo beurt yega ya ta laat caba”, Dijkhoff a subraya.
El a sigui bisa cu ora den e maneho di Hospital por wak cu berdaderamente tur cos ta dirigi na eficiencia, pero nan a lubida di controla si e eficiencia aki no ta bay na costo di e acceso na cuido pa pueblo.
“E ta algo sumamente peligroso y mi ta bisa hasta inaceptable si nos ta papia for di punto di bista di e pashent, pueblo. Pasobra ta un hospital general nos tin. Anto bo ta corta gasto si, y nos ta sostene esey pa manten’e sostenible, si; pero no a costo di acceso na cuido cu ta hustamente e ‘Curt business’, e servicio primario cu hospital tin”, Jayburtt a señala.
Ademas, el a relata cu el a haci un analisis tambe, a base di e relato financiero cu parti di AZV, pa wak si nan ta cuadra, si basicamente AZV ta bisa berdad, pa wak si e cifranan aki ta cuadra.
“Pero asina mes, AZV tin un reserva di 15 miyon florin, pa bay wordo aloca segun gobierno ta haya ta bon. Pero den tur esaki, na unda e pashent a keda? Si nos wak hospital, por ehemplo, hopi aña caba, nan a deshaci di e asina yama ‘Pashent Raad’ (Conseho di Pashent), pa bin cu edificio nobo a haci cambionan structural y no ta consulta cu e pashentnan; y esaki ta algo sumamente peligroso cu no ta wordo controla pa gobierno. E mesun cos cu ta conta pa AZV. No tin transparencia, na unda e placanan aki a bay, ken ta bay beneficia for di nan, no ta duna cuenta for di e placa di fondo publico, unda esaki ta bay wordo aloca”, Jayburtt Dijkhof PhD., a conclui.
