Apertura di Monumento antes Botica Aruba a tuma lugar Diabierna

Directora Fondo di Monumento Anne Witsenburg sumamente contento y gradici:

ORANJESTAD (AAN) — Anne Witsenburg, directora di Monumentenfonds, a yama un conferencia di prensa Diabierna mainta, den edificio renova di antes Botica Aruba y cual apertura a tuma lugar na e momento aki.

Witsenburg a expresa cu e ta contento di anuncia cu Monumentenfonds a keda cla cu henter e renovacion di e edificio, y el a yama bon bini na e huurdonan di e propiedad. E dama a expresa cu esaki ta bay duna un bida nobo na e monumento na e edificio aki, y e ta bay tin dos funcion nobo.

Uno ta e restaurant y otro ta Cocolishi Studios, cu ta bay ubica den e parti abao. E parti ariba nan ta trahando riba dje ainda, y ta spera cu aki un par di luna por invita prensa pa e apertura di e edificio aki.

Anne Witsenburg a enfoca riba KOAL Restaurant, cu a habri su porta pa publico, y di parti di Monumentenfonds el a desea e doñonan hopi exito. El a expresa su gradicimento pa scoge un monumento pa pone nan restaurant eyden. El a gradici tambe tur esnan cu a participa den e proyecto aki, esta e contratista y subcontratista, y e arkitectonan concerni.

Ademas a gradici señora Daphne Fernandez Pedra, lider di e proyecto cu a coordina tur e trabao pa haya e apertura Diabierna di e siman aki. El a relata cu ocho aña pasa Monumentenfonds a cumpra e edificio aki riba fundeshi. Pasobra e valor tabata hopi abao nan tabata tin miedo cu e por a cay den man robes di un hende cu por a destrui e monumento.

Witsenburg a menciona cu na prome instancia nan no tabata tin ningun idea kico ta bay haci cu e monumento, pero a cumpre djis pa salvaguardia esaki.

E edificio aki tin hopi detaye original y el a wordo poni den su forma original. Asina e director di Fondo di Monumento a indica.

“Cu finalizacion di Botica Aruba, nos por garantiza como fundacion, un biaha mas, cu un otro edificio ta keda preserva pa futuro generacionnan” el a conclui, reiterando su gratitud pa tur esnan cu a participa den e renovacion di e monumento aki.