Hose Figaroa, Sindicato FTA
ORANJESTAD (AAN) – Den entrevista cu DIARIO, mr. Hose Figaroa di Sindicato FTA, a indica cu na aña 2022, tempo cu FTA a gana e referendum na e compania Diamonds International, a tarda un temporada prome cu e negociacion a cuminza.
Esey a hiba na un paro laboral pa por a inicia cu e negociacionnan. E negociacionnan a cana pero a sinti si cu di parti di e gerencia a cuminza rek esakinan hopi, locual a conduci cu Diahuebs mainta, atrobe tabata tin otro paro di trabao.
E sentimento cu tabata tin a resulta cu ta corecto siendo cu henter e proceso di rekmento di e negociacion a sali afo cu ta un triki di parti di e gerencia di Diamond, pa purba cumpra algun trahador ofreciendo nan un pakete pa bay, y asina kibra e forza di e sindicato den e empresa.
FTA ta lamenta esey, pasobra ora un empresa ta haci tanto esfuerzo pa no yega na un acuerdo cu e sindicato, e unico conclusion cu por yega na dje ta cu e empresa tin algo di sconde y cu tin mal intencionnan pa cu e trahado. “Un empresa cu ta transparente, cu ta trata su trahadornan bon, no tin motibo pa haci asina dificil pa yega na un acuerdo, cu den principio ta na beneficio di ambos partido”, mr. Figaroa a señala.
El a agrega cu na momento cu e paro a tuma lugar Mediador di Gobierno a intermedia, y a yama e partidonan aden. “Tabata tin un reunion Diahuebs mainta cu ambos partido, y aworaki nos ta pendiente si e proceso ta den man di Mediador, pa purba wak si por yega na un solucion ainda, unda cu e partidonan por logra un CAO”, e abogado a indica.
El a splica cu e negociacionnan tabata canando, numa cu slow y ta di lamenta cu no a yega na un conclusion. Abogado Figaroa ta haya straño si, cu un empresa cu ta negocia pa un temporada relativamente largo, diripiente ta yega y bisa cu e ta bay para e negociacion, pasobra den su opinion no tin mayoria mas den e empresa. Aworaki FTA ta pendiente di kico Mediador di Gobierno ta bay haci, mr. Figaroa a subraya.
