Presidente di FTA, Hose Figaroa
*Departamento di Labor mester tin iniciativa di controla!
ORANJESTAD (AAN) – Presidente y Abogado di FTA, mr. Hose Figaroa, den entrevista cu DIARIO, a comenta cu tin cierto empresanan cu a bin di afo pa gana placa na Aruba, cu no ta respeta e leynan laboral di e Isla.
Figaroa, logicamente, no ta generaliza, pero ta un hecho cu sa sosode. Esaki ta un responsabilidad di e empresa mes, y un falta di respet di un empresa cu ta bin un pais, y no ta pone su mes na haltura di kico ta e reglanan cu ta conta den e pais. “Bo kier bin establece na Aruba, bo kier gana placa na Aruba, bo mester respeta e derechonan di e trahado na Aruba. Na final di dia na momento cu bo a traha placa no ta abo (empresa) a trahe, ta e trahado para na pia di trabao, ta traha e placa pa bo como gerencia, como doño di un empresa”, Abogado di FTA a remarca.
El a agrega cu un di e problemanan cu FTA ta haya hopi ta e falta di control. No ta facil pa un trahado cu ta mira algo fout ta pasa na pia di trabao, pa e mes saca su cabes y bay denuncia pasobra e sa cu esey por tin consecuencia na dje. Tin empresanan cu tin sindicato y e sindicato ta haci esey den nomber di e trahado. “Pero empresanan cu no tin sindicato, hopi biaha e drempel pa e trahado bay entrega un keho na, por ehemplo, Departamento di Labor, ta halto. Pues, e miho manera pa domina esey, ta pone un control mas halto unda no ta e trahado mester bay Departamento di Labor, pero Departamento di Labor ta bin na e empresa, y ta controla wak si tur cos ta na ordo. Esey ta un problema cu ainda nos tin akinan, cu e control ey no ta tuma lugar”, Abogado mr. Hose Figaroa a subraya.
Figaroa a splica cu den e reunionnan cu ta tumando lugar aworaki, den e cuadro di e reformanan cu a wordo proponi door di Hulanda pa cu nos leynan laboral esey ta e puntonan cardinal. Kico ta wordo haci. “Pasobra na Aruba nos tin hopi regla, tin hopi ley, pero si no tin un control cu e leynan ta wordo cumpli cune, anto tanto bal cu bo ta pone regla. Ta mescos cu bisa cu ta ilegal pa trece droga na Aruba, pero bo no ta pone douane controla na aeropuerto. Anto si bo no pone control, hende di su mes no ta bay respeta e reglanan ey. Pues bo mester tin control in place y sancionnan tambe pa asina forza esnan cu no kier cumpli cu e leynan laboral”, Abogado mr. Hose Figaroa a remarca.
