Apertura di exposicion di Alida Martinez na Cas di Cultura

ORANJESTAD (AAN): Recientemente a tuma lugar apertura di exposicion di Alida Martinez den sala di exposicion na Cas di Cultura conoci como Sala Unoca.

E apertura a wordo haci door di Roly SintJago, unda poeticamente a deleita e presentenan cu un descripcion di obranan y e percepcion su tras.

E coleccion ta consisti di varios obheto - scultura , instalacion, collages y dibuhonan.

E obra "Un porciento pa Art Tax" ta uno cu ta refleha unda mester para keto pa traha y yega na e fondonan pa por tin un Museo Contemporaneo pa Aruba. Cu e propuesta aki por contempla e posibilidad pa cuminsa traha esaki. Tambe e propuesta di e instalacion "El Madurismo" ta refleha pa medio di uso di corant, como obra di arte original traha, cu ta informa riba noticianan acumula riba e situacion di ciudadanonan y  cu ta imigra na otro paisnan door di mal maneho y di poder politico.

E obranan ta refleha y ta pone riba teblachi un dialogo cu e espectador. E coleccion aki di "Give them Faith in their own voice" lo ta disponibel pa wak na Cas di Cultura Aruba for di 16 te cu 27 di augustus durante horario di 9 am pa 4 pm, di dialuna pa diabierna. Cas di Cultura ta mantene regla di uso di tapaboca como obligatorio.