Apenas awe Comision di Vuurwerk lo wordo forma pa eherce control rond di e isla

ORANJESTAD (AAN) – Manera cu DIARIO a duna informacion caba, tur personal di seguridad, di transporte, y comerciantenan tabata riba pia for di madruga caba,

pa asina observa e proceso di saca tur clapchi y vuurwerk for di deposito di Wela, pa asina esaki wordo distribui rond di Aruba.

   Polisnan a duna un man den e proceso aki, y habitantenan por a tende desordo den madruga di trucknan pisa coriendo cu container cu clapchi fresco cu tabata wordo entrega rond di Aruba na e comerciantenan.

   E biaha aki, a nota cu e persona principal encarga cu seguridad rond di clapchinan, esta Rubin Ponson di DOW tabata ausente.

   Informacion cu DIARIO ta dispone di dje, ta indica cu esey ta un di e motibonan cu e asina yama ‘Comision di Vuurwerk’ no a sali haci control Dialuna 27 mainta ora cu a saca e containernan for di Wela.  Tambe a menciona cu tabatin algun compania cu parce di a traha hopi desorganiza y tin varios container bashi, pues sin clapchi ainda.

   Pero awe Diamars 28 di December 2021, desde 9:00 am, un Comision lo bay subi caya cueste loke cueste pa haci control.

   A ser splica na DIARIO, cu pa awor ta e inspectornan di Cuerpo di Bombero ta bay tuma e trabao over, pero no ta conoci kendenan ta forma e Comision, y señor Rubin Ponson lo no tey pasobra e tin kebrante di salud.

    Toch cu tur e trabao riba otro, DIARIO a haya sa cu en total 32 container cu clapchi a wordo saca Dialuna den seis ora, cuminzando pa 1’or di madruga pa 7’or di mainta, cu ta sigur un bon trabao, ya cu normalmente nan ta cuminza 3’or di madruga te 11’or di mainta. Pero e aña aki nan a pone un meta di saca 32 container den seis ora, segun informacion cu DIARIO a ricibi.