Pone sentido di responsabilidad enfrente Aruba na prome lugar --- Ciencia ta sigui traha riba vacuna cu ta sigui adapta na variante --- Diferencia grandi entre awe y ayera pa loke ta trata atake di Covid-19
ORANJESTAD (AAN)- For di momento cu Covid-19 a presenta, paso a paso DIARIO a informa Arub, guia pa expertonan local y internacional.
Awe e variante Omicron ta afecta Aruba, cu na final di December 2020 tabata den un situacion diferente na awe.
Na final di 2020, Aruba tabata en espera di yegada di un vacuna contra un malesa mortal pa cual mundo no a prepara.
Awe Aruba tin e suerte grandi di ta ricibi su booster, mientras na cantidad di pais ainda ni e prome vacuna no a yega na poblacion.
E hecho cu despues di dos vacuna mester di un booster, ta crea ambiente pa e vacuna wordo cuestiona.
Awe DIARIO tin un responsabilidad pa sigui informa su lectornan a base di informacion di expertonan y no a base di loke DIARIO ta pensa.
Ta berdad cu Omicron ta mas resistente contra vacuna y booster. Pero mescos ta berdad, cu hende cu a vacuna ta mucho mas resistente contra Covid-19 cu personanan cu no a vacuna.
DIARIO ta pone su mes na haltura personalmente cu hende cu a haya Omicron y a vacuna. Personanan cu ta pertenece na e grupo di riesgo pero cu a vacuna, ta papia na un forma diferente for di personanan cu no ta den e grupo di riesgo pero tampoco a vacuna na 2020.
Mundo ta papia awe di un variante cu resultadonan menos pisa. Un variante ta nifica cu e virus ta cambia.
Hende ta wordo confronta pues cu un virus cu ta parce mas resistente, pero e hende tambe ta mas resistente pasobra e ta vacuna.
Si mira e cantidad di personanan cu a perde nan bida pasobra nan no tabata vacuna, por hinca rudia y yama danki pa e resultadonan na 2021.
Awe henter e situacion na Aruba ta duna prueba, cu algo a cambia. E resultado di e virus ta menos fuerte pues, pero e virus ta wordo confronta cu un mundo mas fuerte.
E proteccion contra Omicron mester wordo adapta. E vacuna mester wordo adapta na e variante nobo pero esaki no ta kita cu e vacuna a evita casonan mortal y casonan serio cu hendenan cu a wordo afecta cu e prome tres variantenan por testigua.
Aruba ta en espera di un aña nobo. Clapchi ta sona pa anuncia yegada di 2022 cu mester di mas sentido di responsabilidad di parti di tur hende.
Prevencion ta cuminsa cu cada hende, cu mester sigui cu e medidanan basico mientras ta sigui vacuna.
Ciencia ta trahando riba adaptacion di e vacuna, cu ta algo nobo. Manera ta e caso cu tur enfermedad nobo, ta poco poco ta yega na un situacion den cual por papia di 100 porciento efectividad berdadero.
2021 ta cera cu motibo pa Aruba yama danki na Cielo cu tabata tin vacuna, cu a permiti hende subi caya atrobe, bolbe na trabou.
Hende, cu awe mester duna prueba di nan sentido di responsabilidad y anima otro pa tuma tur proteccion pa asina ta prepara pa Omicron cu por ta un variante mas suave, pero tambe a topa cu un Pueblo arma cu un vacuna!
