APA lo analiza e posibilidad di tuma Arutram bao su maneho

Director Marc Figaroa:

*Tin plan riba mesa pero nada sigur ainda 

ORANJESTAD (AAN) – Tin un proyecto riba mesa pa mira si tin posibilidad pa Aruba Ports Authority N.V. (APA), tuma bao su encargo, e maneho y operacion di Arutram. Intencion di e traspaso aki ta riba mesa, pero no ta un hecho ainda, segun director di APA, Marc Figaroa a duna di conoce, den entrevista cu DIARIO.

APA mester evalua si bal la pena, kiermen nan no a dicidi cu ta bay tum’e pero nan lo ta interesa. “Depende. E mester di nos estrategia, y mester ta algo positivo pa APA. Nos lo purba incorpor’e den Cruise Experience Development, e ora ey, p’asina nos wak con nos ta incorpor’e cu e pasaheronan di crusero. E tin su retonan cu ne y nos tin cu wak prome si nos kier hacie” señor Figaroa a señala.

E intencion ta cu e ta bira parti di e operacion, pero ta hopi trempan pa APA duna un comentario, tin aspectonan cu mester tuma lugar prome pa wak e oportunidadnan pa bin na un decision. El a indica cu ora nan caba cu a fase di Welcome Plaza, cu tur e kiosconan, e ora ey Arutram ta bira e di dos tema cu nan ta bay atende cu ne. E ta spera cu pa October cu e temporada halto ta drenta e parti di Welcome Plaza ta cla, p’asina wak con nan por mehora. “Mi ta kere e ta na bienestar di tur hende pa e ta mas organiza y estructura, pasobra na final di dia e ta e prome y ultimo impresion cu bo ta duna na e pasaheronan di cruseronan sin lubida e tripulacion”, director di APA a señala.

Señor Figaroa a bisa cu tin reglanan, por ehemplo di seguridad, etc., cu ta conta no solamente pa tur operador, pero pa tur usuario en general, y nan tin un badge cu nan ta atende na APA, y e reglanan tur hende tin cu atende, incluyendo e director y su trahadornan.

“Mirando cu bo ta na waf bo tin cu tene bo mes na reglanan di seguridad y safety p’asina bo no kier daña e nomber di otro”, el a expresa.

El a agrega cu nan tin un cooperacion tremendo cu autoridadnan local, y te unda e sa, e ta canando basta bon. E intencion ta pa haci e waf un tiki mas grandi pa acomoda e fluho di trahadornan tambe.